Joldaýdyń árbir bastamasyn tabysty júzege asyrý - barshamyzdyń ortaq mindetimiz. Bul týraly búgin elimizdiń birqatar azamatyn memlekettik nagradamen marapattaý rásiminde QR Prezıdenti Qasym-Jomart Toqaev aıtty, dep habarlaıdy Almaty-akshamy.kz QazAqparatqa silteme jasap.
«Joldaýdaǵy árbir bastamany osy maqsatqa jetý jolyndaǵy naqty qadam deýge bolady. Ony tabysty júzege asyrý - barshamyzdyń ortaq mindetimiz. Qazir aýmaly-tókpeli kezeń bolyp tur. Geosaıası ahýal kúnnen-kúnge ýshyǵa túsýde. Onyń salqyny belgili sebepterge baılanysty Qazaqstanǵa da tıedi. Biraq, biz baǵdarymyzdan aınymaı, kózdegen maqsatymyzǵa jetemiz», - dedi Qasym-Jomart Toqaev.
Qazaqstan Prezıdenti sol úshin «Bir jaǵadan bas, bir jeńnen qol shyǵaryp» jumyla jumys isteýimiz kerektigin basa aıtty.
«Búginde árbir otandasymyz egemen elimizdi órkendetýge óz úlesin qosýda. Halqymyz qashanda bereke-birlikke, yrys-yntymaqqa asa mán bergen. Ózara janashyrlyq pen qamqorlyqty barynsha dáriptegen. Sonyń arqasynda jurtymyz barlyq qıyndyqty eńserip, kele jatqany sózsiz», - dedi Memleket basshysy.