Bul týraly QR İİM esirtki qylmysyna qarsy is-qımyl departamentiniń erekshe tapsyrmalar jónindegi aǵa ınspektory Serik Sultanov málimdedi.
Onyń aıtýynsha, «Qarasora» is-sharasy bastalǵaly 1300-den astam qylmys anyqtaldy, 765 satý faktisi toqtatyldy, dep habarlaıdy Almaty-akshamy.kz.
«Ótken aptada Jambyl oblysynda esirtki boıynsha iri quqyqbuzýshylyqtardyń joly kesildi. Belbasar aýylynda avtokólikti tekserý kezinde 2 qap keptirilgen marıhýana tabyldy. Tárkilengen esirtkiniń jalpy salmaǵy 34 kelige jetti», - dedi QR İİM esirtki qylmysyna qarsy is-qımyl departamentiniń erekshe tapsyrmalar jónindegi aǵa ınspektory Serik Sultanov aptalyq brıfıńte.
Zańsyz aınalymnan 8 tonnadan astam esirtki, onyń ishinde 168 keli sıntetıkalyq túr tárkilendi. 24 narkolaboratorıa taratyldy.
«4 uıymdasqan qylmystyq toptyń qyzmeti toqtatyldy, 8 qylmystyq is qozǵaldy, onyń ishinde uıymdasqan qylmystyq top uıymdastyrǵany úshin 6 jáne transulttyq topty qurǵany úshin – 2 is bar. 100 kg-nan astam esirtki, 84 tonnadan astam prekýrsorlar jáne 24 tonna «kóknár» tárkilengen 4 kóshbasshy men 30-dan astam qylmystyq top qatysýshylary qylmystyq jaýapqa tartylady», - dedi Serik Sultanov.
Aıta keteıik, jyl saıyn maýsym aıynan qazanǵa deıin jabaıy qarasoranyń ósýi men pisýi kezeńinde «Qarasora» jedel-profılaktıkalyq sharasy ótkiziledi.
Ótken aıda polıseıler 315 qylmysty anyqtady, onyń ishinde 121 ótkizý faktisi, esirtkini zańsyz saqtaýdyń 49 faktisi, quramynda esirtki bar ósimdikterdi ósirýdiń 114 faktisi bar.