Olarǵa qarsy bultartpaý sharasy bas bostandyǵynan aıyrmaý sharasyna ózgertildi.
İİM qańtar oqıǵasy kezinde kámeletke tolmaǵan 12 adamnyń aýyr qylmys jasaǵanyn anyqtady, dep habarlaıdy Almaty-akshamy.kz
Májilistiń jalpy otyrysynda İİM Marat Ahmetjanov qańtar oqıǵasy kezinde jaǵdaıdy paıdalanǵan shabýylshylardyń taǵy bir bóligi qalanyń ár jerin tonaýǵa kiriskenin aıtty. Olar memlekettik organdardyń ǵımarattaryn basyp alyp, qarjy uıymdaryn, bank termınaldaryn, aıyrbastaý qurylǵylaryn tonap ketken. Sonymen qatar qala turǵyndarynan tartyp alynǵan tehnıkalar men kólikterdi paıdalanǵan.
«1466 ǵımarat, onyń 1395-i kásipkerlik nysany, 71-i memlekettik mekemege shabýyl jasaldy. 1700 azamat zardap shekti. Kásipkerlik sýbektilerine keltirilgen zalal – 100 mlrd. Sol kúnnen bastap (5 qańtar) aımaqtarda tótenshe jaǵdaı rejımderi men komendanttyq saǵattar engizildi. 6 qańtarda saǵat 00.00-den bastap terorızmge qarsy operasıa rejımi jarıalandy», dedi mınıstr.
Mınıstrdiń sózinshe, bul qysqa merzim, ıaǵnı 6-7-8 qańtar eldegi quqyqtyq tártipti qalpyna keltirýge múmkindik berdi. Degenmen, ókinishke qaraı, 19 qyzmetker qaza tapty. 3 037 polısıa men áskerı qyzmetkerler jaraqat aldy. 28-ine oq tıip, 177-niń súıekteri synǵan. 111-niń denesi sýyq qarýmen pyshaqtalǵan. Kóptegen qyzmetkerler áli de emdelip jatyr.
Jalpy, polısıa qańtar oqıǵalary boıynsha 4 623 qylmystyq isti tergedi. Olardyń kóbi – adam óltirý (91), urlyq (2504), qarý-jaraqtyń zańsyz aınalymy (440), buzaqylyq (368), bóten múlikti qasaqana búldirý qylmystary (188). 20 myńnan astam azamattan jaýap alyndy. 5 myńnan astam saraptama taǵaıyndaldy. Urlanǵan múliktiń kóbi tárkilendi. Qylmystyq ister boıynsha 983 adam ustaldy. Onyń 502-si arnaıy prokýrorlarǵa berildi.
«Memleket basshysynyń tapsyrmasy boıynsha jeńildetetin mán-jaılardyń bolýyn eskere otyryp, 255 adam bosatyldy. Bular - sottylyǵy joq jáne zalaldy óz erkimen ótegen azamattar. Adamdardyń kópshiligine bas bostandyǵynan aıyrmaıtyn bultartpaý sharalary qoldanyldy. Tótenshe jaǵdaı kezinde aýyr qylmys jasaǵany úshin 12 kámeletke tolmaǵandar anyqtalyp, olarǵa qarsy bultartpaý sharasy bas bostandyǵynan aıyrmaý sharasyna ózgertildi. Jalpy, tergeý qylmystyq prosestiń úsh býyndy modeline sáıkes júrgizilip jatyr, ıaǵnı tergeýshilerdiń barlyq negizgi sheshimi prokýrordyń qadaǵalaýy arqyly kelisiminen jáne sottyń baqylaýmen ótedi», - dedi İshki ister mınıstri Marat Ahmetjanov.
Mınıstrliktiń málimetinshe, búginde 631 aıyptalýshy sotqa joldandy. Olardyń 132-si – bas bostandyǵynan aıyryldy, al qalǵandaryna shekteý, qoǵamdyq jumystar men aıyppuldar salyndy. Birqatar kúdiktiler jábirlenýshilerge keltirilgen zalaldy óz erkimen ótedi.