Qazaqstan Prezıdenti Qasym-Jomart Toqaev memleket jáne qoǵam qaıratkeri, bilim berý isiniń qurmetti qyzmetkeri Shámshá Kópbaıqyzy Berkimbaevanyń dúnıeden ótýine baılanysty kóńil aıtty, dep habarlaıdy almaty-akshamy.kz BORT №1 Telegram kanalyna silteme jasap.
«Shámshá Kópbaıqyzy eńbek jolyn qatardaǵy ustazdyqtan bastap, óziniń iskerligi men qabiletiniń arqasynda memlekettik qyzmettiń san túrli salasynda abyroımen eńbek etti. Mınıstr kezinde bilim men ǵylym kóshin alǵa jyljytyp, básekege qabiletti qoǵam qalyptastyrýǵa mol úles qosty. Depýtat bolǵan tusta otandyq zańnamany jetildirýge atsalysty. Qazaq memlekettik qyzdar pedogogıkalyq ınstıtýtynyń rektorlyq qyzmetin atqarǵan jyldary talaı shákirt tárbıelep, daryndy mamandarǵa baǵdar kórsete bildi», – dep jazylǵan Memleket basshysynyń jedelhatynda.
Prezıdent keń peıilimen aınala-tóńireginiń shynaıy qurmetine bólengen Shámshá Kópbaıqyzynyń jarqyn beınesi umytylmaıtynyn atap ótken.