Memleket basshysy Qasym-Jomart Toqaev Azıadaǵy ózara is-qımyl jáne senim sharalary keńesine (AÓSSHK) múshe memleketterdiń syrtqy saıası vedomstvo basshylarynyń altynshy keńesine qatysý úshin Nur-Sultan qalasyna kelgen Úndistannyń Syrtqy ister mınıstri Sýbramanıam Djaıshankardy qabyldady, dep habarlaıdy almaty-akshamy.kz
Kezdesýde taraptar saıası, saýda-ekonomıkalyq jáne ınvestısıa salalaryndaǵy yntymaqtastyqty kúsheıtý boıynsha Qazaqstan men Úndistan arasyndaǵy kóp josparly baılanystardy damytýdyń keleshegin talqylady.
Qasym-Jomart Toqaev Sýbramanıam Djaıshankarmen áńgimelesý barysynda Keńeske múshe memleketterdiń mınıstrleriniń búgingi kezdesýine Úndistannyń qatysqany mańyzdy ekenin aıtyp, ol eldiń basshylyǵyna Qazaqstannyń bastamalaryna qoldaý bildirgeni úshin rızashylyǵyn bildirdi.
Memleket basshysy mınıstrge elimizde COVID-19-ǵa qarsy kúres boıynsha qabyldanyp jatqan sharalar, Aýǵanstandaǵy jaǵdaıdy turaqtandyrý jáne oǵan gýmanıtarlyq kómek kórsetýge Qazaqstannyń qosyp otyrǵan kúsh-jigeri týraly aıtty.
Sondaı-aq Prezıdent eki el arasyndaǵy áýe baılanysyn qalpyna keltirýdiń mańyzdy ekenin, bul Qazaqstan men Úndistan arasyndaǵy baılanystardy odan ári damytýǵa tyń serpin beretinin atap ótti.
Óz kezeginde Úndistannyń syrtqy saıası vedomstvosynyń basshysy Qasym-Jomart Toqaevqa Ortalyq Azıa óńirin yntymaqtastyqtyń mańyzdy baǵyty sanaıtynyn Úndistannyń Premer-mınıstri Narendra Modıdiń sálemin jetkizdi. Bul rette úndi dıplomaty óz eliniń basshylyǵynyń Qazaqstan Prezıdentin kelesi jyly Úndistanǵa saparmen kelýge shaqyratynyn jetkizdi.
Áńgimelesý kezinde pandemıanyń saldarlaryn joıý máselelerine basa mán berildi. Sýbramanıam Djaıshankar Qasym-Jomart Toqaevqa ekpe sertıfıkattaryn ózara moıyndaý jónindegi eliniń usynysyn jetkizip, Úndistannyń farmasevtıka jáne ekonomıkany sıfrlandyrý salalary boıynsha yntymaqtastyqty jandandyrýǵa ázir ekenin aıtty.