Qazaqstan Respýblıkasynyń Prezıdenti Qasym-Jomart Kemeluly Toqaevtyń elimiz boıynsha qalyptasqan tótenshe jaǵdaı men qoǵamdyq tártipsizdikke qatysty Májiliste jasaǵan málimdemesi memleketimizde jyldar boıy qordalanyp qalǵan tereń áleýmettik, ekonomıkalyq, saıası, qaýipsizdik jáne qorǵanys máselelerin sheshýge baǵyttaldy.
Sonyń ishinde, ásirese, Prezıdenttiń eldegi oryn alǵan jappaı tártipsizdikterdi aýyzdyqtap, el azamattarynyń qaýipsizdigi men tynyshtyǵyn qamtamasyz etý maqsatynda Ujymdyq Qaýipsizdik Sharty Uıymynyń (UQSHU) kómegine júginýi óte durys sheshim bolǵanyn aıtyp ótý kerek. Osy máselege qatysty eldegi azamattar arasynda UQSHU áskerı kontıngentteriniń Qazaqstanǵa kelýine oraı birqatar alyp qashpa áńgime, aqparat tarady. Biraq, Prezıdent Toqaev bul áskerı kontıngentterdiń basty mısıasy – eldegi qoǵamdyq tártipti qalpyna keltirýge kómektesý, odan keıin aldaǵy eki kúnnen keıin UQSHU áskerleri elden birtindep ketedi dep naqty shegelep aıtyp ótti.
Ekinshiden, Prezıdent Toqaev táýelsizdik alǵaly beri elde áleýmettik, bıznes, ekonomıka jáne ulttyq baılyqty ıgerý salasynda qalyptasqan, tamyry tereńge ketken problemalardy, ashyq aıtyp, qordalanǵan máselelerdi aldaǵy ýaqytta tıisti dárejede sheshiletinin basa kórsetýi kóńilge senim uıalatady. Prezıdent osy ýaqytqa deıin shamadan tys baıyp ketken kompanıalar men olıgarhtar toby eldegi básekelestikti tómendetkenin basa aıtty.
Osy oraıda Memleket basshysy endi Úkimet halyqtyń muń-muqtajyn oılap, áleýmettik máselelerdiń túıinin sheshýge erekshe basymdyq berý kerek ekenin ańǵartty. Sonyń ishinde Qazaqstan boıynsha halyq narazylyǵynyń bastalýyna túrtki bolǵan basty másele – eldegi qymbatshylyq, baǵanyń turaqsyzdyǵy, strategıalyq mańyzy bar taýarlar men ónimder baǵasynyń tym sharyqtap ketýi. Osyǵan oraı jańa qurammen jasaqtalatyn Úkimetke makroekonomıkalyq baǵdarlamalardy júzege asyrý, ınflásıany tejeý jáne áleýmettik máselelerdi sheshýdi qatań tapsyrdy.
Qasym-Jomart Kemeluly Toqaev memleket jáne ult úshin osyndaı qıyn qystaý ýaqytta kóregendik tanytyp, strategıalyq sheshimder qabyldap, elde bolǵan qasiretti oqıǵadan sabaq alý kerek ekenin aıryqsha atap ótti.
Eń bastysy, Memleket basshysy eldegi azamattardyń aryz-ótinishterin eskeretin, «tyńdaýshy memleket» qaǵıdasyn damytyp, áleýmettik memleket qurýdy, baǵa turaqsyzdyǵy men qymbatshylyqty, ulttyq valútanyń devalvasıasyn jáne ınflásıany aýyzdyqtaýdy, olıgarhıalyq ádiletsiz júıeni joıýdy, eldiń ishki qaýipsizdigi men syrtqy qorǵanysyn qamal etýdi strategıalyq mindetter retinde alýy Qazaqstandy turaqtylyq pen beıbitshilikke, ekonomıkalyq damý men gúldenýge alyp baratynyna kámil senemiz.