Túrkistannyń baı tarıhy týraly baıandaıtyn «Myńjyldyqtar toǵysyndaǵy Túrkistan» kórmesiniń saltanatty ashylýy búgin Qazaqstan Respýblıkasynyń Ulttyq mýzeıinde ótti, dep habarlaıdy almaty-akshamy.kz
Respýblıka kúni men Túrki memleketteri uıymynyń 10-shy mereıtoılyq samıtine oraılastyrylǵan is-sharany Qazaqstan Respýblıkasy Mádenıet jáne aqparat mınıstrligi uıymdastyrdy. Kórmeniń maqsaty – dala mádenıetiniń álemdik órkenıettegi erekshe ornyn kórsetý, túrki mádenı murasyn keńinen nasıhattaý, túrki memleketteri arasyndaǵy mádenı yntymaqtastyqty odan ári tereńdetý.
İs-sharanyń ashylý saltanatyna Parlament depýtattary, joǵary oqý oryndarynyń rektorlary, tarıh jáne fılologıa ǵylymdarynyń doktorlary, profesorlar, murajaı men kitaphana ókilderi qatysty.
Qatysýshylar 3 bólimnen turatyn «Tarıhy tereń Túrkistan», «Túrkistan-Túrki áleminiń rýhanı ortalyǵy», «Joshy Ulysynan (Ulyq Ulys) Qazaq handyǵyna deıin» ekspozısıamen tanysty.
XIV ǵasyrǵa jatatyn eksponattar Qoja Ahmet Iasaýı kesenesi qurylysynyń tarıhy men erekshelikteri týraly baıandaıdy, sondaı-aq kelýshiler Shyńǵys han kezeńiniń, Joshy Ulysy (Ulyq Ulys) dáýiriniń jáne Qazaq handyǵynyń sáýlettik jáne nýmızmatıkalyq eksponattaryn tamashalady. Jalpy, kórmede birneshe tarıhı hronologıalyq kezeńder qamtylǵan.
Kórmege barlyǵy «Áziret Sultan» memlekettik tarıhı-mádenı murajaı-qoryǵynyń tarıhynan syr shertetin 130-ǵa jýyq biregeı jádigerler qoıylǵan. Olardyń árqaısysy tarıhtyń bir úzindisin ǵana emes, sol zamannyń rýhyn da alyp júr.
Qoja Ahmet Iasaýı kesenesi ornalasqan Túrkistan - eń kóne qala, túrki órkenıetiniń rýhanı áleminde erekshe oryn alady. Bul uly shedevr IýNESKO-nyń búkilálemdik mura tizimine engen sátten bastap jıyrma jyl ótti.