QR Sý resýrstary jáne ırrıgasıa mınıstrligi joǵary jáne joǵary oqý ornynan keıingi bilim berý mamandyqtarynyń qoldanystaǵy jikteýishine túzetýler engizip, birqatar mamandyqtardy qosýdy usyndy, dep habarlaıdy Almaty -akshamy. kz.
Atap aıtqanda, «Gıdrotehnıkalyq qurylys jáne nysandar», «Melıorasıa jáne sýarmaly eginshilik», «Eldimekenderdi sýmen jabdyqtaý jáne sý burý», «Sý resýrstaryn basqarý», «Gıdrotehnıkalyq melıorasıa», «Sý sharýashylyǵyndaǵy tehnologıalyq prosesterdi avtomattandyrý jáne basqarý», «Inovasıalyq tehnologıalar jáne olardy sý sharýashylyǵynda paıdalaný», «Irrıgasıalyq júıelerdegi gıdroenergetıkalyq nysandar», «Gıdromelıorasıalyq jumystardy mehanıkalandyrý», «Sý sharýashylyǵy ekonomıkasy» mamandyqtary.
Dál osy mamandyqtardy magıstratýra jáne doktorantýra baǵdarlamalaryna da qosý usynylady. Al, beıindi joǵary oqý oryndarynyń stýdentteri gıdrotehnıkalyq qurylystardyń barlyq túri bar mınıstrliktiń vedimistik baǵynysty uıymdarynda óndiristik praktıkadan ótedi dep josparlanyp otyr.
Sondaı-aq, mınıstrlik qazaqstandyq stýdentterdi sý salasy mamandyqtary boıynsha jaqyn jáne alys shetelderdiń joǵary oqý oryndarynda oqytý úshin grant bólý máselesin de qaraýǵa nıetti. Budan bólek, sý sharýashylyǵy qyzmetkerleriniń biliktiligin arttyrý ortalyqtary uıymdastyrylady. Al halyqaralyq seriktestermen birlesip joǵary oqý oryndarynda jańadan «Sý dıplomatıasy» mamandyǵyn engizý josparlanýda.
«Kadr tapshylyǵy máselesin sheshý úshin mınıstrlik sý resýrstaryn basqarý, paıdalaný jáne qorǵaý salasyndaǵy mamandardy daıarlaý jáne olardyń biliktiligin arttyrý baǵdarlamalaryn jetildirý jóninde qajetti sharalar qabyldaýǵa nıetti. Sý sharýashylyǵy mamandarynyń jalaqysyn arttyrý máselesi jeke qaralatyn bolady.
Sonymen qatar, biz basqa elderdiń tıimdi tájirıbesin qabyldaıtyn bolamyz. Ol úshin halyqaralyq baılanys baǵytynda belsendi jumys júrgizilip jatyr», - dedi QR Sý resýrstary jáne ırrıgasıa mınıstri Nurjan Nurjigitov.