Ónerkásip jáne qurylys mınıstrligi eldegi sırek metaldar týraly málimetterdi qupıa derekter tiziminen shyǵarýdy usynyp otyr.
Vedomstvo mamandarynyń paıymynsha, bul shara elge keletin ınvestısıany molaıtyp, tyń óndiristerdi ashýǵa múmkindik beredi, dep habarlaıdy Almaty-akshamy.kz Kazinform.kz-ke silteme jasap.
Atalǵan usynys mınıstrlik ázirlegen «Sırek jáne jerde sırek kezdesetin metaldar salasyn damytýdyń 2024-2028 jyldarǵa arnalǵan keshendi jospary» jobasynda kórinis tapqan.
«Keıbir sırek metaldar men barlyq sırek jer metalynyń balanstyq qory týraly málimetterdi memlekettik qupıalarǵa jatqyzý salaǵa ınvestısıa tartý prosesine teris áser etedi. Bul aqparat áleýetti ınvestorlar úshin qoljetimdi bolýy qajet. 2021 jylǵy tájirıbe kórsetkendeı, birqatar sırek metaldyń balanstyq qoryn, sonyń ishinde lıtııdi qupıasyzdandyrý osy salaǵa ınvestısıa tartýǵa múmkindik berdi. Nátıjesinde jer qoınaýyn paıdalanýshy qazaqstandyq eki kásiporyn nemis kompanıasymen lıtıı ken oryndarynda geologıalyq barlaý jumystaryn júrgizýge sharttar jasasty», - dep jazylǵan Ashyq NQA saıtynda jarıalanǵan keshendi jospar jobasynda.
Osylaısha mınıstrlik ókilderi sırek metaldyń jekelegen túrlerinen qupıalylyq rejımin alyp tastaýdy usynyp otyr.
Jospar jobasynda bul shara 2024-2025 jyldary Ádilet mınıstrligi men Ulttyq qaýipsizdik qyzmetiniń maquldaýy negizinde sheshimin tabýy kerektigi aıtylǵan.
Qazaqstannyń jer qoınaýynda vólfram, molıbden, berılı, sırkonıı, gafnıı, nıobıı, tantal, vısmýt, lıtıı, sezıı jáne renıı sıaqty sırek metaldardyń qory, sondaı-aq «sırek jer metaly» deıtin sanatqa jatatyn ıttrıı, lantan, serıı, prazeodım, neodım, samarıı, eýropıı, gadolınıı qory kezdesedi.
Olardyń ishinde ınvestorlar úshin eń tartymdysy mynalar:
- vanadı qory (Qurymsaq, Bala-Saýysqandyq);
- tıtan jáne sırkonıı (Qaraótkel, Obýhovskaıa, Shoqash, Shpakovka, Qumkól, Sabyndykól, Prognoznoe, Gorkovskoe, Berezovskoe, Zaıachá, Drýjba, Aqespe);
- tantal men nıobıı ( Joǵarǵy Yrǵyz, Kvarsevoe, Joǵarǵy-Baımýrzın, Qalaı-Tapqan);
- lıtıı boıynsha (Iýbıleınoe, Joǵarǵy-Baımýrzın, Baken, Belogorsk, Ahmetkıno, Medvedka);
- molıbden jáne vólfram (Kóktenkól, Drojıllovskoe, Joǵarǵy Qaıraqty, Smırnovskoe, Ońtústik Jaýyr, Janet, Batystaý, Aqshata, Qaraoba, Baınazar);
- berılı (Nurataldy, Darat).