Qazaqstannyń densaýlyq saqtaý mınıstri Aqmaral Álnazarova ana óliminiń aldyn alý maqsatynda kontraseptıvter satyp alýǵa jergilikti búdjetten qarjy bólý qajet ekenin aıtty, dep habarlaıdy Aqshamnews.kz. Bul týraly ol Úkimet otyrysynda málimdedi.
Mınıstr qazirgi qoldanylyp jatqan sharalarǵa qaramastan, elimizdiń alty óńirinde ana óliminiń kórsetkishi ósip otyrǵanyn atap ótti. Onyń ishinde eń kúrdeli jaǵdaı Aqmola oblysynda tirkelgen – bul aımaqtaǵy kórsetkish respýblıkalyq deńgeıden jeti ese joǵary.
"Ana óliminiń negizgi sebepteri – aýyr ekstragenıtaldy aýrýlar (55%) jáne akýsherlik faktorlar (45%)", – dedi Álnazarova.
Mınıstr osy qaýipterdiń aldyn alý úshin birneshe usynys jasady. Ol ákimdikterge medısına qyzmetkerlerin jumysqa tartý, olardyń biliktiligin júıeli túrde arttyrý jáne aýrýhanalardyń materıaldyq-tehnıkalyq jaǵdaıyn jaqsartý úshin qarjy bólýdi usyndy.
Sonymen qatar, Álnazarova óńirlik bılikten júkti áıelder men balalardy oblys ortalyqtaryndaǵy medısınalyq mekemelerge jetkizýge arnalǵan kólikpen qamtamasyz etýdi, sondaı-aq bala týý jasyndaǵy áleýmettik osal toptaǵy áıelderge kontraseptıvter usynýǵa búdjetten qarajat qarastyrýdy surady.