Prezıdent Qysqy Olımpıada oıyndary men Paralımpıadaǵa qatysatyn ūlttyq qūrama músheleríne Memlekettík tudy tapsyrdy Zakon.kz.
Qasym-Jomart Toqaev dúnıe júzíníń eń myqty sportshylary baq synaıtyn Italıyadaǵy XXV Qysqy Olımpıada oıyndary men XIV Qysqy Paralımpıadany aıryqsha mańyzdy oqıǵa dep atady.
"Olımpıada oıyndaryna 40-qa juyq sportshymyz qatysady. Olar sporttyń 10 túrínen jarysqa túsedí. Ūlttyq qūrama músheleríníń jartysynan kóbí Olımpıadaǵa alǵash ret bara jatyr. Jahandyq báseke sízder úshín zor múmkíndík árí úlken synaq bolmaq. Qysqy Olımpıadaǵa joldama alu úshín sportshylarymyz kóptegen belesten óttí. Túrlí halyqaralyq jarysta tabysty óner kórsetíp, 17 altyn, 31 kúmís jáne 21 qola medalǵa ıe boldy. Sonymen bírge bíz Paralımpıada oıyndarynda el abyroıyn qorǵaıtyn sportshylarymyzǵa zor sením artamyz. Paralımpıadashylardyń erekshe qūlshynysy jáne myqty erík-jígerí kópke úlgí. Nauryz aıynyń basynda Italıyada ótetín Paralımpıada oıyndaryna ázírge 10 lıtsenzıya aldyq. Lıtsenzıya sany álí de kóbeyuí múmkín", – dedí Prezıdent.
Memleket basshysy tórt jylda bír ótetín baıraqty básekege qazaqstandyq sportshylar tyńǵylyqty daıyndalǵanyna toqtalyp, Qysqy Olımpıada jáne Paralımpıada oıyndarynda shyn myqtylar kúsh synasatynyn aıtty.
"Árıne, sportta jeńístí boljau múmkín emes. Bíraq Sízder qatań íríkteulerden súrínbeı ótíp, Qazaqstannyń olımpıadalyq qūramasyna múshe boldyńyzdar. Osynyń ózí, Sízderdíń áleuetteríńízdí, jeńíske degen ūmtylystaryńyzdy tanytady. Táuelsízdík alǵan uaqyttan berí sportshylarymyz Qysqy Olımpıada oıyndarynda sheberlík tanytyp, bírneshe márte jeńís tūǵyrynan kóríne bíldí. Vladımır Smırnov, Lyudmıla Prokasheva, Elena Hrustaleva, Denıs Ten, Yulıya Galysheva sıyaqty Olımpıada júldegerleríníń esímderí otandyq sport tarıhyna altyn áríptermen jazyldy. Álemdík sporttaǵy írí arenalarda top jarǵan otandyq atletterdíń qūrmetíne talaı ret Ánūran shyrqalyp, elímízdíń Tuy kókte jelbíredí. Aldaǵy uaqytta da jarqyn jeńíster kútíp tūrǵanyna senímdímín. Jaqynda Ūlttyq qūryltaı otyrysynda atap ótkenímdeı, sporttaǵy jetístíkter tūtas elímízdíń mártebesín kóteríp, jalpyūlttyq bírlíktí jáne Qazaqstan Respublıkasynyń qazírgí álemdegí bedelín nyǵaıtady", – dedí Qasym-Jomart Toqaev.
Prezıdent namysty qoldan bermegen sportshylarymyz talaı básekede top jaryp, elímízdíń mereıín asyryp, naǵyz jasampaz otanshyldyqtyń úlgísín kórsetíp júrgenín atap óttí
"Ár azamatymyzdyń jetístígí – Qazaqstannyń jetístígí. Ár sportshynyń abyroıy – barsha qazaqtyń bedelí. Jeńíske jetu úshín talap pen tabandylyq kerek. Sízder sheberlíkteríńízdí shyńdap, ayanbaı eńbek ettíńízder. Sonyń arqasynda dúbírlí dodaǵa qatysuǵa múmkíndík aldyńyzdar. Olımpıada chempıony bolu – ár sportshynyń armany. Osy maqsatqa bír taban jaqyn tūrsyzdar. "El senímí – erge júk" deıdí halqymyz. Baptaryńyz jáne baqtaryńyz qatar shauyp, júldemen kelesízder dep senemín. Barsha halqymyz Sízderge jankúıer, tílekshí bolady. Báríńízge sáttílík, jeńís tíleımín! Kók Tuymyz árdaıym bıíkte jelbíreı bersín!" – dedí Memleket basshysy.
Qasym-Jomart Toqaev Qazaqstan Respublıkasynyń Memlekettík tuyn Ūlttyq qūramanyń múshelerí Denıs Nıkısha men Ayaulym Ámrenovaǵa jáne Qazaqstan paralımpıadalyq komandasynyń múshesí Erbol Hamıtovqa tabystady.