Kodeks mátini BAQ betterinde jarıalanady
Memleket basshysy Qasym-Jomart Toqaev Qazaqstan Respýblıkasynyń Áleýmettik kodeksine qol qoıdy, dep habarlaıdy Almaty-akshamy.kz.
QR Parlamentiniń Senaty jańa quqyqtyq júıeni qamtıtyn atalǵan zań jobasyn 2022 jyldyń naýryz aıynyń ortasynda qabyldaǵan bolatyn.
Kodekste kelesi negizgi baǵyttar qamtylǵan:
- ulttyq demografıalyq saıasattyń faktory retinde ana men balany qoldaýdyń basymdyǵy;
- eńbek naryǵyn damytý jáne jumyspen qamtýǵa járdemdesýdi uıymdastyrýdyń jańa tásilderi;
- az qamtylǵan otbasylarǵa materıaldyq ál-aýqatyn arttyrýǵa kómektesý;
- arnaýly áleýmettik qyzmetter júıesin jetildirý;
- múgedektigi bar adamdardy áleýmettik qorǵaý;
- zeınetaqymen qamsyzdandyrýdy odan ári jetildirý;
- asyraýshysynan aıyrylǵan adamdardy áleýmettik qoldaý;
- áleýmettik qamsyzdandyrýdyń jekelegen normalaryn halyqaralyq standarttar deńgeıine keltirý;
- otbasynyń sıfrlyq áleýmettik kartasy;
- áleýmettik qyzmetkerdiń kásibıligi men mártebesin arttyrý.
Qabyldanǵan Kodekstiń maqsaty - jumyspen qamtylý mazmunyna, ıaǵnı platformalyq jumys pa, birlesken jumys (bir jumys ornynda eki jumysshy) pa, jumys kestesi ózgermeli me, jumys aptasy tórt kúndik pe jáne basqalaryna qaramastan barlyq jumysshynyń eńbek quqyqtaryn teńestirý. Ol úshin zańnamaǵa jańa uǵym engiziledi: "táýelsiz jumysshy".
Iandeks Taksı, Glovo jáne t.b. barlyq onlaın-platformalar jarıa túrde shart jasasýǵa mindetteledi jáne ofertaǵa qosylatyn kez kelgen taksı júrgizýshisi nemese kýrer osylaısha barlyq áleýmettik jeńildiktermen qamtylǵan dep esepteledi.
Bul rette biriktirilgen tólemdi engizý esebinen salyqtardy, zeınetaqy jáne áleýmettik aýdarymdardy tóleýdi barynsha jeńildetý jáne jalpy tabysqa salynatyn salyq júktemesin azaıtý usynylady. Al burynǵy biryńǵaı jıyntyq tólem joıylady.
Sonymen qatar, 2024 jyldan bastap qazaqstandyqtar qosymsha zeınetaqy tólemin ala alady.