Memleket basshysy Qasym-Jomart Toqaev Qazaqstan halqyn Ramazan aıynyń bastalýymen quttyqtady, dep habarlaıdy almaty-akshamy.kz Aqordanyń baspasóz qyzmeti málim etti.
«Qymbatty otandastar!
Sizderdi Ramazan aıynyń bastalýymen quttyqtaımyn! Halqymyz úshin Qasıetti orazanyń mán-mańyzy aıryqsha. Bul – qoǵamda ımandylyq, adaldyq, janashyrlyq, meıirimdilik sıaqty myzǵymas qundylyqtarǵa barynsha mán beriletin kezeń. Búkil musylman qaýymynyń yntymaǵy artyp, bir-birine baýyrmaldyǵy aıqyn kórinetin mezgil.
Oraza aıy rýhanı tazarýǵa, muqtaj jandarǵa kómek qolyn sozyp, qaıyrymdylyq jasaýǵa úndeıdi. Sol arqyly barsha adamzattyń bereke-birligi nyǵaıa túsýine yqpal etedi. Din men dástúr sabaqtastyǵyn berik ustanatyn el tatýlyǵyn, turaqtylyǵy men tynyshtyǵyn saqtap, kez kelgen syn-qaterden súrinbeı óte alady. Men Qazaqstan halqynyń árdaıym rýhanı úndestikte ómir súrip, bolashaqqa nyq qadam basatynyna senemin. Oraza qabyl bolsyn! Barshańyzǵa zor densaýlyq, amandyq, tolaıym tabys tileımin!», - dep jazylǵan Prezıdent quttyqtaýynda.