Olardyń kinásiniń dárejesi men jaza túrin sot anyqtaıdy.
QR Ulttyq qaýipsizdik qyzmeti basshylarynyń álsizdigi jeke quramnyń rýhyn túsirdi. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaıdy Almaty-akshamy.kz QazAqparatqa silteme jasap.
«Aýmaqtyq kúshtik organdar basshylarynyń bılikti asyra paıdalanýy týraly faktilerge jeke toqtalǵym keledi. Jappaı tártipsizdikter shegine jetken kezde Almaty qalasy, Almaty oblysy men Qyzylorda oblysynyń Ulttyq qaýipsizdik komıteti departamentteriniń jeke quramynyń barlyǵy óz ǵımarattaryn tastap ketken», - dedi B.Asylov.
Tergeý málimeti boıynsha, 5 qańtarda jeke quramnyń ǵımarattan ketýge daıyndalýy kerektigi jóninde Ulttyq qaýipsizdik komıteti tóraǵasynyń orynbasary Sadyqulovtyń nusqaýy kelip túsken.
«Másimovtiń tapsyrmasy boıynsha Almaty qalasy men Qyzylorda oblysynyń Ulttyq qaýipsizdik komıteti departamentteriniń jeke quramy jumys oryndaryn tastap ketken. Sondaı-aq basshylyqtyń nusqaýy boıynsha Almaty jáne Jambyl oblystarynyń polısıa departamentteri óz ǵımarattaryn tastap ketken. Týrasyn aıtqanda, osy basshylar álsizdik tanytty. Bul óz kezeginde jeke quramnyń rýhyn túsirdi. Sonyń saldarynan tártipsizdiktiń jolyn kesý boıynsha sharalar ýaqtyly qabyldanbaǵan», - dedi Bas prokýror.
Osy oraıda ol Almaty men Taldyqorǵan eki kún boıy qarýly sodyrlardyń bıliginde bolǵanyn aıtty. Olar qarý-jaraqtyń úlken arsenaly – 3 myńǵa jýyq avtomat, pıstolet, snaıperlik vıntovka jáne on myńdaı oq-dárini tonap ketti. Iaǵnı, osy basshylardyń kesirinen eń qaýipti atys qarýlary búlikshilerdiń qolyna tústi. Áli kúnge deıin 2 myńǵa jýyq qarýdyń qaıda ekeni belgisiz. Arnaıy prokýrorlar bılikti asyra paıdalanýdyń osy faktileri boıynsha tergeýdi aıaqtady. Ulttyq qaýipsizdik komıtetiniń úsh aýmaqtyq departamentiniń eks-basshylary, Almaty oblysy polısıa departamentiniń burynǵy bastyǵy jáne basqa adamdarǵa qatysty qylmystyq ister sotqa joldandy. Qazir sot talqylaýy bolyp jatyr. Olardyń kinásiniń dárejesi men jaza túrin sot anyqtaıdy», - dedi B. Asylov.
Onyń sózine qaraǵanda, Jambyl oblysy polısıa departamentiniń eks-bastyǵyna qatysty qylmystyq qýdalaý toqtatyldy.