3 qazanda Almatyda belgili qazaqstandyq rejıser Azız Zaırovty eske alýǵa arnalǵan «Mama, ıa jıvaıa!» fılminiń aldyn ala kórsetilimi ótedi.
Fılm «Bezgranıchnye vozmojnostı!» kınotrılogıasynyń úshinshi jáne sońǵy bólimi. Áleýmettik dramada qyzy leıkemıaǵa ushyraǵan kámeletke tolmaǵandardyń isteri jónindegi ınspektor áıeldiń ómiri baıandalady. Kınokartına ananyń sheksiz mahabbaty, balasynyń ómiri úshin kúresi týraly, dep habarlaıdy aqshamnews.kz Mádenıet jáne aqparat mınıstrligine silteme jasap.
Basty rólderde daryndy qazaqstandyq akterler Sýltanna Shengel, Adel Mahmýtova, İlıas Oýtov, Aslanbı Medeýlov jáne Baqytjan Orynbasar oınady. Senarı avtorlary – Azız Zaırov pen Muhammed Mamyrbekov.
2022 jyly «Mama, ıa jıvaıa!» fılmi alǵash ret Kanndaǵy álemdik premerada Cannes 7th Art Awards kınofestıvalinde kórsetildi. Onda ol «Grand Prix of the Silk Road countries» eń joǵary marapatyna ıe boldy. Sonymen qatar fılm basqa da halyqaralyq syılyqtar men júldeli oryndardy ıelendi.
Azız Zaırovtyń ózi múmkindigi shekteýli adamdardyń biri bolǵandyqtan, ómirin múgedek balalar men eresekterge kómektesýge arnaǵan. Olardy óz fılmderine túsýge jıi shaqyrǵan. Ol Qazaqstandy álemge tanyta júrip, kóptegen adamdarǵa úlgi bola bildi. Artynda baı shyǵarmashylyq mura qaldyrdy. Onyń kınodaǵy eńbegi ózi ómirden ótkennen keıin de ýaqyt synynan súrinbeı keledi.
QR Mádenıet jáne aqparat mınıstrliginiń, Ulttyq kınony qoldaý memlekettik ortalyǵy men «Skif» stýdıasynyń qoldaýymen túsirilgen fılmdi kórermender 3 qazannan bastap Almaty, Astana, Qaraǵandy, Taldyqorǵan, Stepnogorsk, Shymkent, Túrkistan jáne Aqtaý sıaqty qalalarda tamshalaı alady. Kórsetilim ótetin kınoteatrlar – «Kinopark», «Arman», «Chaplin» jáne «Cinemax».