Búgin Qazaqstan men Ázerbaıjannyń Ulttyq kitaphanalary arasynda yntymaqtastyq týraly memorandýmǵa qol qoıý rásimi ótti.
Qujat - kitaphanalyq-aqparattyq qyzmetti odan ári damytý, halyqaralyq jazba ádebıetterdi almasý jáne eki el arasyndaǵy mádenı baılanystardy nyǵaıtýǵa negiz bolady, dep habarlaıdy aqshamnews.kz Mádenıet jáne aqparat mınıstrligine silteme jasap.
İs-sharanyń mańyzdy sátteriniń biri – Ázerbaıjan ádebıeti buryshynyń ashylýy. Ádebı buryshta klasıkalyq jáne zamanaýı ádebıettiń 250-den astam basylymy, el memlekettiliginiń qalyptasý tarıhy, ázerbaıjan halqynyń salt-dástúrleri men ádet-ǵuryptary týraly shyǵarmalar usynylǵan. Sonyń ishinde aqyn jáne oıshyl Muhammed Fızýlı, Myrza Fatalı Ahýndov, Gýseın Djavıdı, jazýshy Anar kitaptary jáne taǵy da basqa tanymal tulǵalardyń týyndylary bar.
Sondaı-aq Ázerbaıjannyń halyq jazýshysy Elmıra Ahýndovanyń Geıdar Álıev pen akademık Zarıfa Álıevanyń 100 jyldyǵyna arnalǵan «Zarıfa jáne Geıdar Alıevter. Máńgilik mahabbat» kitabynyń tanystyrylymy ótti.
Kitapta avtor óz keıipkerleriniń balalyq shaqtan eresek jasqa deıingi búkil ómir jolyn baıandap, olardyń jeke ómiri, bala tárbıesi jáne atalǵan kórnekti juptyń basyna túsken synaqtary týraly áńgimeleıdi.
Saltanatty sharaǵa Ázerbaıjan Mádenıet mınıstri Adıl Kerımlı, QR MAM Arhıv, qujattama jáne kitap isi komıteti tóraǵasynyń orynbasary Rollan Quspan, Túrki mádenıeti men murasy qorynyń prezıdenti Aqtoty Raıymqulova, Ázerbaıjan Ulttyq kitaphanasynyń bas dırektory Kerım Tahırov, sheteldik dıplomatıalyq mısıalardyń ókilderi, Qazaqstannyń ǵylymı jáne shyǵarmashylyq zıalylary, JOO stýdentteri men magıstranttary qatysty.