Nurlan Nyǵmatýlın Májilis palatasynyń jumysyn qorytyndylady
Parlament Májilisiniń tóraǵasy Nurlan Nyǵmatýlın palatanyń 2021 jylǵy jumysyn qorytyndylady, dep habarlaıdy Almaty-akshamy.kz QazAqparatqa silteme jasap.
«Búgin biz 2021 jyldyń qorytyndy jalpy otyrysyn ótkizip otyrmyz. Sondyqtan osy jyldyń jáne jalpy ekinshi sesıanyń keıbir nátıjelerine toqtalmaqpyn. Erekshe aıtý kerek, jýyrda ǵana Qazaqstan Táýelsizdigine 30 jyl toldy. Osy 30 jyldyń árbir belesi - biz úshin qaıtalanbas tarıh. Bul jolda bizdiń Parlament ózine júktelgen jaýapkershilikti abyroımen atqaryp, elimizdiń saıası-ekomıkalyq, áleýmettik, mádenı damýynyń zańnamalyq tiregi bolyp keledi. Biz qabyldaǵan árbir qujat, eń aldymen, elimizdiń ekonomıkasyn arttyrýǵa, halyqtyń áleýmettik jaǵdaıyn, sonyń ishinde ónerkásip, densaýlyq, bilim salalaryn jaqsartýǵa arnalyp keledi», - dedi N. Nyǵmatýlın palatanyń jalpy otyrysynda.
Sonymen birge ol bıyl shaǵyn jáne orta bıznes, ekologıa máselelerine de erekshe nazar aýdarylǵanyn atap ótti.
«Osynyń barlyǵy Tuńǵysh Prezıdent-Elbasy Nursultan Nazarbaevtyń strategıalyq tapsyrmalaryn jáne Memleket basshysy Qasym-Jomart Toqaevtyń bastamalaryn sapaly zańdarmen qamtamasyz etýge baǵyttalyp otyr. Aldymyzda áli de kóptegen mańyzdy mindetter tur. Biz kelesi jyly da qalyptasqan tájirıbeni, múmkindikti paıdalana otyryp, elimizdegi reformalardy jáne ózgeristerdi tıisti zańdarmen qamtamasyz etemiz dep senemiz», - dedi Májilis tóraǵasy.
Osy oraıda ol depýtattarǵa, Májilis apparatynyń qyzmetkerlerine birlesken jumystary úshin alǵys aıtty. 2022 jyly aýqymdy jumys kútip turǵanyna toqtalǵan N. Nyǵmatýlın barsha fraksıanyń, depýtatardyń birlesken jumysynyń arqasynda Májilis sapaly ári tıimdi zańnamalyq qoldaýdy qamtamasyz etetinine senimdi ekenin aıtty.
Budan buryn habarlanǵandaı, búgin Májilistiń jalpy otyrysynda depýtat Bekbolat Tileýhannyń ókilettigi merziminen buryn toqtatyldy.