Tólem avtomatty túrde taǵaıyndalady.
Qazaqstan Úkimeti keler jyldan bastap jumysynan aıyrylǵandarǵa tólenetin járdemaqy kólemin ósirýdi kózdep otyr, dep habarlaıdy Almaty-akshamy.kz.
«Memlekettik áleýmettik saqtandyrý qorynan jumysynan aıyrylýyna baılanysty járdemaqy alýshylardyń sany 101 myń adamǵa jetti. Bul rette bıyl 98,1 myń adamǵa tólem alǵash ret taǵaıyndalǵan», - delingen Eńbekmıni baspasóz qyzmetiniń habarlamasynda.
Qoldanystaǵy zańnamaǵa sáıkes, jumystan bosatylǵan jumyskerler mindetti áleýmettik saqtandyrý júıesine qatysý ótiline jáne sońǵy 24 aıdaǵy tabysyna baılanysty 1 aıdan 6 aıǵa deıin jumysynan aıyrylýy boıynsha áleýmettik tólem alady.
Járdemaqy aıyrylǵan kiristiń 40%-yna deıingi mólsherde MÁSQ qarajaty esebinen tólenedi.
Tólem taǵaıyndaý úshin jumystan bosatylǵan jumysker:
- eGov.kz portalynda avtorızasıalaný;
- «Jumysqa ornalastyrý jáne jumyspen qamtý» bóliminde «Jumys izdeýshi adamdardy tirkeý» qyzmetin tańdaý;
- onlaın-qyzmetke tapsyrys berip, barlyq joldardy toltyrý jáne oǵan ESQ-men qol qoıyp, ótinim jiberý qajet;
- bir kún ishinde turǵylyqty jerińizdegi halyqty jumyspen qamtý ortalyǵy (budan ári – HJQO) bos jumys oryndaryn usynady;
- eger jumys tabylmasa, 3 jumys kúni ishinde qashyqtan jumyssyz mártebesi beriledi (qajet bolǵan jaǵdaıda sizge HQO qyzmetkeri qosymsha aqparat jınaý úshin habarlasady);
Bul qyzmetti onlaın rejımde elektrondy eńbek bırjasy (enbek.kz) arqyly da alýǵa bolady.
Jumyssyz retinde tirkelý týraly málimetter bolǵan kezde Eńbekmıniniń aqparattyq júıesi proaktıvti formatta MÁSQ-tan tólemdi taǵaıyndaý boıynsha qyzmet kórsetýge kelisý úshin mobıldi telefonǵa SMS-habarlama jiberedi.
Kelisken jaǵdaıda SMS-habarlamaǵa jaýap berý qajet. Tólem avtomatty túrde taǵaıyndalady.
Esterińizge sala keteıik, MÁSQ qarajaty esebinen jumystan aıyrylǵan jaǵdaıda tólenetin áleýmettik tólem jumystan shyǵý sebepterine qaramastan júzege asyrylady jáne jumyssyz adamdy ol jumys izdegen kezeńde qoldaýǵa arnalǵan.
Memleket basshysynyń bıylǵy jylǵy 1 qyrkúıektegi Joldaýyn iske asyrý úshin 2023 jylǵy 1 qańtardan bastap tabysty almastyrý koefısıentin 40%-dan 45%-ǵa deıin ulǵaıtý kózdeledi.
Bul rette tólem taǵaıyndaý tártibi saqtalady jáne jumysynan aıyrylǵan jáne jumyssyz mártebesin alǵan júıege qatysýshylarǵa ǵana qoldanylady.
Jumysynan aıyrylý boıynsha áleýmettik tólem mólsherin arttyrý, 2023 jylǵy 1 qańtardaǵy jaǵdaı boıynsha, jumys istep turǵan alýshylarǵa da áser etedi, ol avtomatty túrde júrgiziledi.