Bul týraly Úkimet basshysy aıtty.
Ortalyq memlekettik organdar men oblys ákimdikteri basshylarynyń qatysýymen keńes ótkizgen QR Premer-Mınıstri Álıhan Smaıylov aldaǵy jylý berý maýsymyna daıyndyq máseleleri jóninde málimdedi, dep habarlaıdy Almaty-akshamy.kz
Úkimet basshysy búginde daıyndyq jumystarynyń barysynda óte muqıat qaraýdy qajet etetin problemalyq máseleler týyndap jatqanyn aıtty. Atap aıtqanda, birqatar obekt boıynsha jóndeý jumystary merziminen keshigip júrýde.
«Bul máseleni biz jaqynda ótken Úkimet otyrysynda talqyladyq. Degenmen ózara úılesimdi, birlesken is-qımyldy budan da kúsheıtý qajet. Sondyqtan osy jumystardyń barlyǵyn taǵy da muqıat qarap, tikeleı sheshim qabyldaımyz», - dedi Álıhan Smaıylov.
Premer-Mınıstr jylý berý maýsymyna daıyndyq máseleleri úlken áleýmettik mańyzǵa ıe ekenin atap ótti, sondyqtan qazirden bastap iri apattardyń aldyn alyp, jylytý maýsymynyń turaqty ótýi úshin qajetti sharalardy qabyldaý qajet.
«Atap aıtqanda, JEO jáne jeliler ıelerimen tikeleı, tyǵyz jumys jasaý mańyzdy. Memleket tarapynan stansıalardyń ótinimderine sáıkes tarıfter bekitildi. Bul qarjylandyrýdy tartýǵa jáne jańǵyrtý jumystaryn bastaýǵa múmkindik beredi», - dedi Álıhan Smaıylov.
Sondaı-aq Úkimet basshysy energetıka salasyn baqylaýdy kúsheıtýdiń jáne tıisti óńirlik shtabtar jumysynyń mańyzyn atap ótti.
Úkimet basshysy birinshi vıse-premer Roman Sklárǵa jáne energetıka mınıstri Almasadam Sátqalıevke kestege sáıkes júrgizilip jatqan jumystardyń barysyn jeke baqylaý úshin respýblıkanyń energetıkalyq nysandaryn tekserýdi tapsyrdy.
«Roman Vasılevıch, búginde siz keste boıynsha Pavlodar oblysynyń energetıkalyq nysandaryn, onyń ishinde Ekibastuz JEO-syn tekserýińiz kerek. Keńes aıaqtalǵannan keıin tez arada jolǵa shyǵýyńyzdy suraımyn. Kelesi aptada Almasadam Maıdanuly Rıdder jáne Kentaý JEO-laryna barady», - dedi Premer-Mınıstr.