Bıyl Junior Eurovision-2021 Parıjde ótedi
Alǵash ret Junior Eurovision-2021 án baıqaýynyń Ulttyq irikteýiniń fınalynda eki qatysýshy jeńimpaz atandy. Fınalda Beknur Jánibekuly jáne Álınur Hamzın birdeı 30,5 paıyz daýys jınady. Endi talantty oryndaýshylar 19 jeltoqsan kúni Parıjde ótetin halyqaralyq baıqaýda «Ertegi álemi» ánimen Qazaqstannyń atynan óner kórsetedi. Bul týraly Almaty-akshamy.kz QazAqparat agenttigine silteme jasap habarlaıdy.
Ulttyq irikteý jeńimpazdary qazylar alqasynyń baǵalaýy jáne telekórermenderdiń SMS-daýys berý nátıjeleri boıynsha anyqtaldy.
Ulttyq irikteý konsertiniń tikeleı kórsetilimi búgin «Habar» telearnasynyń efırinde ótti. 10 fınalıst tanymal qazaqstandyq kompozıtorlardyń arnaıy jazylǵan avtorlyq ánderimen óner kórsetti.
Parıjde ótetin 19-shy Junior Eurovision Song Contest balalar án baıqaýyna 19 el qatysady. Olar: Albanıa, Armenıa, Ázerbaıjan, Bolgarıa, Fransıa, Grýzıa, Germanıa, Irlandıa, Italıa, Qazaqstan, Malta, Nıderlandy, Soltústik Makedonıa, Polsha, Portýgalıa, Reseı, Serbıa, Ispanıa jáne Ýkraına.