Vaksınany quıý daıyndyqtary aǵymdaǵy jyldyń sáýir aıynan bastaý alǵan.
Almaty oblysynda QazVac vaksınasyn quıa bastaıdy, dep habarlaıdy Almaty-akshamy.kz.
«Qarasaı aýdanyna qarasty Abaı aýylyndaǵy «Antıgen» UKP JSHS alańynda “QazVac” vaksınasynyń 1 mln. dozasyn quıý josparlanyp otyr», – delingen Almaty oblysy ákiminiń baspasóz qyzmetiniń habarlamasynda.
Búginde ıtalán óndirisiniń apparaty bir mınýt ishinde 60 qutyǵa vaksına quıa alady. Ár qutyda 3 dozadan. Shilde aıynan beri 300 myń dozasy quıyldy. Bul jumys barysyn jáne qural-jabdyqtardy tekserýge arnalǵan valıdasıalyq serıa. Sonymen qatar óndiristik shyǵarylym barlyq talaptarǵa jáne aseptıkalyq óndiristiń sanıtarlyq normalaryna sáıkes keledi. Barlyq qural-jabdyqtar Eýropa, Amerıka jáne Qytaıdan ákelindi. Osylaısha sapanyń halyqaralyq standarttary kásiporynǵa joǵary tehnıkalyq dárejege jetýge serpin beredi.
«Antıgen» JSHS-na "Jetisý" ÁKK arqyly 420 mln. teńge qarjyǵa lızıń negizinde 13 birlik zamanaýı tehnıkalyq qural-jabdyq satyp alyndy. Atalǵan jobanyń júzege asýy QR Úkimetiniń tikeleı baqylaýynda. Alańǵa Premer-Mınıstrdiń orynbasary Eraly Toǵjanov birneshe ret kelip, daıyndyq barysyn tikeleı baqylaýda», - deıdi oblys ákiminiń orynbasary Batyrjan Baıjumanov.
Óz kezeginde «Antıgen» UKP JSHS dırektory Nurlan Ahmetsadyqov búgingi kúni 300 myń doza quıylǵan vaksına bıologıalyq qaýipsizdik máseleleri ǵylymı zertteý ınstıtýtynda ekenin aıtty.
«Zertteýler aıaqtalýǵa jaqyn. «Antıgen» JSHS alańynda quıylǵan vaksına tek tolyq tekseristen ótkennen keıin baryp qana qoldanysqa engiziletinin aıta ketken jón», - dep atap ótti dırektor.
Eske salsaq, Memleket basshysy Qasym-Jomart Toqaevtyń tapsyrmasyna sáıkes, otandyq sapaly QazVac vaksınasy daıyndaldy. Ónerkásiptik óndiristi uıymdastyrý maqsatynda Premer-Mınıstr Asqar Mamınniń qadaǵalaýymen ótken jyldyń 12-shi maýsymynda bıologıalyq qaýipsizdik máseleleri ǵylymı-zertteý ınstıtýty bazasynda bıofarmasevtıkalyq zaýyttyń qurylysy bastaldy. «Antıgen» UKP JSHS bıofarmasevtıkalyq zaýytty qosqanda bıologıalyq qaýipsizdik máseleleri ǵylymı-zertteý ınstıtýtynyń bazasyndaǵy ekinshi óndiristik alań boldy.