Almaty kúni qarsańynda Fransıanyń Renn qalasymen baýyrlastyqtyń 30 jyldyǵy qurmetine oraı velosherý aıaqtaldy
Bıyl Almaty qalasy men Fransıanyń Bretan aımaǵynyń astanasy Renn qalasy arasyndaǵy baýyrlastyqqa mereıli 30 jyl toldy. Pandemıa kezinde birlesken saparlardyń ornyna 44 jastaǵy Loran Mae velosherý ótkizdi, dep habarlaıdy Almaty-akshamy.kz.
Búgin Loran Mae velosherýdi aıaqtap, Almatyǵa keldi, 3,5 aı ishinde 9 myń shaqyrymdy júrip ótip, 15 elde boldy. Saıahatshyny qalaǵa kire beriste «Almaty Cycling Team» kontınentaldy komandanyń velosıpedshileri qarsy alyp, «Qazaqstannyń Táýelsizdigi» monýmentine alyp bardy, qonaqty ol jerde qala ákimshiligi jyly qarsy aldy.
Almaty qalasy ákiminiń orynbasary Erjan Babaqumarov Almaty men Renniń arasyndaǵy baýyrlastyq Táýelsizdiktiń tańynda, 1991 jyly bastalǵanyn atap ótti. Jyldan-jylǵa ekijaqty qarym-qatynas nyǵaıa túsýde. Mádenı-gýmanıtarlyq yntymaqtastyq belsendi túrde damýda, ózara mádenıet kúnderi, kórmeler, konsertter ótkizilýde. 20 jyldan beri Renn men Almatynyń otbasylary birine-biri qonaqqa baryp, ózara dástúr men turmysty keńinen tanýda, qalalar mektepteri arasynda yntymaqtastyq qalyptasýda. Osydan 5 jyl buryn Renn qalasyndaǵy «Almaty» baǵynda baýyrlastyqtyń 25 jyldyǵyna oraı qazaqtyń uly fılosofy men oıshyly Abaıdyń bústi ashylǵan edi.
Óz kezeginde velosaıahatshy Loran Mae Renn qalasynyń meri Natalı Apperdiń hatyn oqyp berdi.
«Loran Mae myrzanyń adamı jáne sporttyq erligi Renn men Almaty turǵyndary úshin batyldyq pen dostyqtyń úlgisi bolyp tabylady. «Barshańyzdy Almaty kúnimen quttyqtaımyn», - delingen hatta».
«Renn qalasy Almatymen baýyrlastyǵyna 30 jyldaı bolǵan yntymaqtastyq pen dostyqty odan ári nyǵaıtýǵa nıetti. Loran Maeniń erligi – osynyń aıqyn dáleli. Baýyrlastyǵymyz, dostyǵymyz nyǵaıa bersin!» - dedi Fransıanyń Bas konsýly Aleksıs Shahtahtınskıı.
«Almaty-Renn jáne álem qalalary dostyǵy qoǵamynyń» vıse-prezıdenti Aıgúl Qasymbek eki qala arasyndaǵy dostyqty nyǵaıtý maqsatynda qandaı sharalardyń júzege asyrylyp jatqanyn aıtty. Mysaly, Almaty mektepteri men joǵary oqý oryndarynda fransýz tilin úırenýdi damytý boıynsha jumystar júrgizilýde.
Aıta keterligi, Loran Mae 15 jasynan bastap Uly Jibek jolyn kórýdi jáne onymen júrip ótýdi armandaǵan eken.
«Qazaqstanǵa kelgen boıda bári jaqsy ótip jatyr. Men Shymkent, Taraz, Túrkistan, Shý qalalarynda boldym jáne qazaqtardyń meni óte jyly qarsy alǵanyn aıtqym keledi. Eýropada bolǵanymda, jańbyr kóp jaýdy, keıde qar astynda qalǵan kezderim boldy. Biraq Qazaqstanǵa kelgennen keıin barlyq qıyndyqtar men qolaısyz aýa raıy artta qaldy. Men velosıpedpen saıahatqa shyqqan kezde úsh maqsatty aldyma qoıdym: Renn-Almaty qalalarynyń 30 jyldyq baýyrlastyǵyn, Qazaqstan Respýblıkasy Táýelsizdiginiń 30 jyldyǵyn atap ótý jáne sizdiń eldi kórý jónindegi kópten bergi armanymdy iske asyrý. Sonyń barlyǵy oryndaldy», - dedi Loran Mae.