Qazan aıynan bastap elimizdiń keıbir aımaqtarynda aýa raıy kúrt ózgeredi. İİM osyǵan baılanysty júrgizýshilerge úndeý jasady, dep habarlaıdy almaty-akshamy.kz.
"Qys mezgiliniń bastalýymen joldaǵy kólik júrisi de erekshe nazar aýdarýdy qajet etedi. Jyldamdyqty asyrmańyz! Qaýipsiz qashyqtyqty saqtańyz! Eger qysqy júrgizý elementteri týraly tolyǵyraq aıtatyn bolsaq, onda jyldamdyqty shamamen saǵatyna 10-15 shaqyrymǵa azaıtý kerek, al kólik arasyndaǵy qashyqtyq 3-4 avtokólik bolýǵa tıis. Mine, osyndaı usaq-túıekterdiń ózi jol jaǵdaıy kúrt ózgergen kezde júrgizýshige durys sheshim qabyldaýǵa kómektesedi", dedi QR İİM ÁPK erekshe tapsyrmalar jónindegi aǵa ınspektory Aqtoty Boranova
Aqtoty Boranovanyń aıtýynsha, qıylystarda baǵdarshamnyń jasyl túsine jyldam qozǵalý – qysqy ýaqytta júrgizýshilerdiń negizgi qatelikteriniń biri.
Ol kólik júrgizýshilerine mynadaı keńesterdi berdi:
Jolǵa nazar aýdaryńyz, kólik júrgizý kezinde telefonǵa telmirmeńiz jáne kólik basqarýmen baılanysy joq nárselerge alańdamańyz. Esińizde bolsyn, kólikti kenetten tejeý basqarý múmkindigin joǵaltýǵa ákep soǵady;
Jol júrisi qaǵıdalaryn, jyldamdyq rejımin jáne qashyqtyqty saqtańyz, kenetten manevr jasaý men basyp ozýdan aýlaq bolyńyz, jol boıyndaǵy jaıaý júrginshilerge óte muqıat bolyńyz, aınalańyzdaǵy jol jaǵdaıyn únemi baqylaýda ustańyz;
Zańnamaǵa sáıkes qys mezgilinde (jeltoqsan, qańtar, aqpan) qysqy shınalarmen jabdyqtalmaǵan kólik quraldaryn paıdalanýǵa tyıym salynatynyn eske salamyz. Qysqy shınalar kólik quralynyń barlyq dóńgelekterine ornatylýy qajet;
Avtokólik ıeleri aýa raıynyń ózgerýin muqıat qadaǵalap otyrýy kerek, eger aýa raıy nasharlasa, eldi mekenderden tys jerlerge shyǵýdy shektegen durys;
Jaıaý júrginshiler qysta kólik tez toqtaı almaıtynyn este ustaǵandary abzal, sondyqtan kósheni kesip ótkende sizge jol bergenine kóz jetkizip, sodan keıin ǵana júristi jalǵastyryńyz;
Saq bolyńyz, telefonmen sóılesýge jáne basqa habarlamalardy kórýge alańdamańyz.
"Óz kezeginde polısıanyń jeke quramyna qyzmet atqarý barysynda qıyn jaǵdaıǵa tap bolǵan jandardyń barlyǵyna kómek kórsetý tapsyryldy. Joldaryńyz qaýipsiz bolsyn!", - dedi Aqtoty Boranova.