Eko-belsendilerdiń bastamasymen Almatyda «Jańa Qazaqstan.Taza tabıǵat» atty jalpyqalalyq senbilik ótti, dep habarlaıdy Almaty-akshamy.kz
21 qazan kúni Almatyda «Jańa Qazaqstan. Taza tabıǵat» atty keń aýqymdy qalalyq senbilik ótti. Almaty qalasy máslıhatynyń depýtattary men ekobelsendiler bastamashy bolǵan aksıa Respýblıka kúnin toılaýǵa oraılastyrylǵan.
Senbilik barysynda demalys aımaqtary, saıabaqtar, skverler, aýla aýmaqtary tazartyldy, 5 myń tekshe metrge jýyq qoqys jınaldy, 9 myńnan astam aǵash otyrǵyzyldy. Ekologıalyq naýqanǵa 34 myńnan astam qala turǵyny qatysyp, 239 tehnıka jumyldyryldy.
Negizgi is-sharalar «Kók-tóbe» taýynyń baýraıynda, ALA saıabaǵynda, Almaty ındýstrıalyq aımaǵy men «Batys» zıratynyń sanıtarlyq-qorǵaý aımaǵy arasyndaǵy ýchaskede jáne Kókqaınar shaǵyn aýdanyndaǵy Boraldaı ózeniniń jaǵasyndaǵy ótti.
Almaty ákimdigi kóshet egý men tazalaýǵa qajetti qural-jabdyq (qolǵap, qap, kúrek, tyrma) usynyp, naýqan qatysýshylaryn aýyz sýmen jáne tamaqpen qamtamasyz etip, jınalǵan qoqysty polıgonǵa shyǵardy. Aýmaqta mádenı-oıyn-saýyq baǵdarlamasy uıymdastyryldy.
Jalpyqalalyq naýqanǵa aýdan ákimdikteri de atsalysty, olar óz aýmaqtarynda komýnaldyq qyzmettermen birigip Túrksib aýdanynda ÚAA boıyndaǵy Baým toǵaıynda, Jas Qanat shaǵyn aýdanynda, Jetisý aýdanyndaǵy Aınabulaq-4 shaǵyn aýdanynda, Medeý aýdanyndaǵy «Kók-tóbe» baýraıynda, Almaly aýdanyndaǵy Saıran kóliniń shyǵys jaǵalaýynda, Áýezov aýdanynda Saıran kóliniń batys jaǵalaýynda, Alataý aýdanynda Boraldaı ózeniniń jaǵasynda, Bostandyq aýdanynda «Dostyq» saıabaǵynyń aýmaǵynda, Naýryzbaı aýdanyndaǵy Shuǵyla shaǵyn aýdanynda jergilikti senbilikter ótkizdi.