«Qazaqtelekom» men aqparattandyrý jáne baılanys qyzmetkerler kásipodaǵy jańa ujymdyq shartqa qol qoıdy. Seriktestiktiń basqarma tóraǵasy Qýanyshbek Esekeev Facebook paraqshasyndaǵy málimdemede jańa kelisim-shart áleýmettik paketti tolyq saqtaı otyryp, óndiris qyzmetkerleriniń aılyǵyn aıtarlyqtaı arttyratynyn aıtqan, dep habarlaıdy Almaty-akshamy.kz
Óndiris jumysshylarynyń jalaqysy biliktilik deńgeıine qaraı orta eseppen 20-50 paıyzǵa artady.
«Ujymdyq shartymyzdyń jańa nusqasynda biz, eń aldymen, jappaı jumysshylar men ınjenerlik-tehnıkalyq qyzmetkerlerdiń laýazymdyq jalaqysynyń tómengi deńgeıin kóterý, sondaı-aq qyzmetkerlerdiń aı saıyn alatyn jalaqysynyń bóligin kóbeıtý mindetin alamyz», - deıdi Q.Esekeev.
Budan bólek kompanıa kóp balaly jáne erekshe qajettilikteri bar balalardy tárbıelep otyrǵan otbasylardy qoldaý baǵdarlamasyn da qosa bekitken.
«Qazirgi ýaqytta kompanıa basshylyǵy qyzmetkerlerdiń jekelegen sanattaryna áleýmettik qoldaý kórsetý boıynsha birqatar bastamalardy qarastyrýda. Bul rette biz qyzmetkerlerimizdiń ózderin de, olardyń balalarynyń bilim alýyn ınvestısıalaýdy jalǵastyramyz», - dep qosty basqarma tóraǵasy.