Nur-Sultan qalasynda el kóleminde sırek kezdesetin jáne joıylyp bara jatqan qar barysyn qorǵaý problemasyna nazar aýdarýǵa arnalǵan «Qar barysyn saqtaıyq» atty aksıa uıymdastyryldy, dep habarlaıdy almaty-akshamy.kz QazAqparatqa silteme jasap.
Atalǵan shara 23 qazan - Halyqaralyq qar barysy kúni qarsańynda uıymdastyrylyp otyr.
«Sońǵy 100 jylda Qazaqstanda qar barysynyń mekendeý aımaǵy úsh esege qysqardy. Búginde atalǵan janýardyń mekendeıtin aýmaǵy 20 myń sharshy metrden sál ǵana asady. Osy oraıda Qazaqstandaǵy BUU Damý baǵdarlamasy qar barysyn saqtap, qorǵaý jáne ony zertteý úshin seriktester uıymdarmen ózara birlesip jumys istep jatyr. Búgingi kúni Jetisý-Alataý aýdanyndaǵy Sholaq, Degeres, Mataı taýlarynda sırek kezdesetin jyrtqyshtyń mekendeıtinin rastaý múmkindigi týdy. Atalǵan óńirlerde barysty alǵash ret fototuzaq túsirip aldy», - dedi BUU Damý baǵdarlamasy uıymynyń Qazaqstandaǵy turaqty ókili Iakýp Berısh aksıa barysynda.
Onyń aıtýynsha, búginde elimizde qar barysynyń popýlásıasyn qorǵaý jáne saqtap qalýǵa arnalǵan birneshe joba qolǵa alyndy.
«Joba sheńberinde qar barysyna qatysty dalalyq zertteýler, brakonerlikke qarsy kúres, erekshe qorǵalatyn tabıǵı aýmaqtar jelisin qurý kózdelip otyr. Sondaı-aq, adamdardyń ekologıalyq saýattylyǵyn arttyrýmen qatar, Qazaqstannyń tabıǵatty qorǵaý zańnamasyn jetildirý jónindegi is-sharalar júrgizilip jatyr», - deıdi ol.
«Qar barysyn saqtaıyq» aksıasy «Barys Arena» muz saraıynda «Barys» pen «Lokomotıv» hokeı klýby arasyndaǵy mach kezinde uıymdastyrylyp otyr.
Oıyndy tamashalaýshylardyń nazaryna qar barysyna arnalǵan fotokórme usynylyp, kelýshiler arasynda utys oıyndar men balalarǵa arnalǵan akvagrım shoý ótti.