«Gulbolsyn» jobasy Almaty qalasyndaǵy názik jandylardyń quqyqtaryn qorǵaýǵa, zorlyq-zombylyqtan zardap shekkenderge kómek berip, qoldaý kórsetýge, ózine-ózi qol jumsaý jaǵdaılarynyń aldyn alý maqsatynda jumys isteıdi, dep habarlaıdy almaty-akshamy.kz
Atalǵan joba Almatynyń daǵdarys ortalyqtarymen, sonymen qatar áleýmettik ana ortalyqtarynyń jelisi - «Baqytty otbasy» bastamasymen birge belsendi júzege asyrylýda. Bul ortalyqtardyń qamqorlyǵyndaǵy kóptegen áıelder «Gulbolsyn» jobasynyń alǵashqy qyzmet alýshylary boldy.
Aı saıyn daýdy sheshý, teńdik máseleleri, turmystyq zorlyq-zombylyqtyń aldyn alý boıynsha pikir alańdary men kezdesýler uıymdastyrylyp otyrady. Zańdyq jáne psıhologıalyq keńes berý úshin qabyldaý bólimderi qurylyp, psıhologtar, zańgerler, jattyqtyrýshylar sıaqty mamandar tarapynan keńes berý qyzmetterin kórsetý boıynsha senim telefondary jumys isteıdi.
Kún saıyn ondaǵan almatylyq áıelder qorqynyshyn umytyp, ómirin qaıta bastaýǵa kúsh alýda, joba bastaý alǵannan beri 1552 adam kómekke ıe boldy.
«Gulbolsyn» jobasy aıasynda Almaty qalasynda qyzdar men áıelderge kómek kórsetetin 3 keńes berý pýnktteri jumys isteıdi, olar «Jas Otan», «Qazaqstan eriktiler lıgasy» bazalarynda jáne «Baqytty otbasy» ortalyǵynda ornalasqan. Negizgi keńes berý núktesi - Baqytty otbasy ortalyǵy bazasyndaǵy pýnkt. Barlyq úsh keńes berý pýnkti jobanyń basynan bastap jumys isteıdi.
Bul joba 2021 jyldyń jeltoqsanyna deıin jalǵasady, biraq uıymdastyrýshylardyń bolashaqqa úlken josparlary bar. Joba meńgerýshisi aýqymyn keńeıtip, tek Almaty qalasyn ǵana emes, búkil Qazaqstandy qamtýdy maqsat etedi.