Jańadan kelgen 2022 jyl óziniń saıası-áleýmettik saladaǵy qıyndyqtarymen, jurtshylyqtyń ereýilderimen bastaldy. Elimizdiń batys óńirlerinde ekonomıkalyq talaptar túrinde bastalǵan beıbit sherýler, mıtıńiler ártúrli destrýktıvti áreketterge boı aldyryp, áleýmettik tolqýlar tutastaı alǵandaǵy Qazaqstannyń birshama qalalaryn sharpyp ótti.
Elimizdiń Prezıdenti Q.K.Toqaev osy kezge deıin barynsha demokratıalyq qundylyqtar ben baǵdarlardy áleýmettik keńistigimizde ornyqtyrýdy maqsat etip kelgeni belgili. Biraq ártúrli salalardaǵy teris pıǵyldy keıbir kúshter eldegi beıbit sherýlerdi daǵdarysty jaǵdaılarǵa, tragedıalyq oqıǵalarǵa jetkizdi.
Árıne, caıası daǵdarysty jaǵdaıdyń sebepteri mamandar tarpynan tereń taldaýdan ótkizilip, tıisti baǵalaryn alary anyq. Degenmen, aıta ketetin jáıt, qoǵamdaǵy kez kelgen oqıǵanyń túpkilikti obektıvti jáne sýbektıvti sebepteri bolady. Mine, solardyń qataryna belgili bir áleýmettik toptardyń barynsha margınaldanýyn, keıbir mınıstrlikter tarapynan ózderiniń midetterin jetkilikti deńgeıde taza oryndaýǵa tyryspaýyn atap ótýge bolady. Osyndaı qubylystardan týyndaıtyn áleýmettik teńsizdik barynsha aıshyqtalatyn kezeń keldi. Áıtpese, qoǵamdaǵy turaqsyz ahýaldy týyndatatyn sebepter aýqymy saqtalyp qalýy da ǵajap emes.
Qazirgi zamanaýı kezeńdegi dúnıetanymdyq ózgerister aıasynda jastarymyzdyń bir bóligi demokratıalyq qadamdardy órkenıetti sıpatta jasaýǵa daıyn emes ekenin baıqatty. Demokratıaǵa úırený jaýapkershilikti qabyldaýmen astasyp jatýy tıis. Mine, osyndaı keıbir qıynshylyqty jaǵdaıdy utymdy paıdalanýǵa tyrysqan sodyrlyq sıpattaǵy kúshter jastardy qańtardaǵy oqıǵalar barysynda óz yqpalynda ustaýǵa árekettendi. Jastardyń keıbiri óz erkimen, keıbiri eriksiz, zorlyqpen teris pıǵyldy qylmysker elementterdiń qaqpanyna tústi, degenine erdi. Sóıtip, elimizdiń ekonomıkasyna búlikshilder zor nuqsan keltirdi. Ókinishke oraı, keıbir zamandastarymyzdyń áreketterinen otansúıgishtik sezimniń eshqandaı kórinisi baıqalmaıdy. Onyń ornyna sheteldik ekstremıstik toptardyń da, jaldamaly sodyrlardyń da osy oqıǵalarǵa aralasyp ketip, arandatý áreketterin barynsha keńinen jasaǵanyn buqaralyq aqparat quraldary arqyly baıqadyq. Aıta ketetin jáıt, elimizdiń quqyq qorǵaý organdary ózderiniń tikeleı mindetterin barynsha gýmanısik negizde atqardy jáne zańnyń sheńberinde qımyldaǵany belgili.
Degenmen, beıbit sherýlerdiń jalǵasyn halyqaralyq terorızm ókilderi óz paıdasyna sheshýdi uıǵarady. Muzdaı qarýlanǵan jaldamaly sodyrlar zańdy memlekettiń irgetasyn shaıqaltpaq nıetin júzege asyrýǵa tyrysty. Oǵan eshkim jol bermeýi tıis bolatyn. Osyǵan oraı memleket basshysy Q.K.Toqaev UQSHU kúshterin quqyq qorǵaý organdaryna kómekke shaqyrǵanynyń ózi qısynǵa keletin áreket edi jáne oryndy qadamnyń arqasynda úlken saıası pozısıa anyqtaldy. Árıne, sodyrlarmen kúresti óz qarýly kúshterimizben, kúshtik qurylymdardyń áleýetimen jeńýge bolatyny anyq edi. Biraq elimiz osyndaı saıası táýelsizdigimizge nuqsan kelýi múmkin qysyltaıań ýaqytta óziniń saıası qatynastaryn ári qaraı aldymen kimmen jalǵastyratynyn álemge tanytty jáne táýelsizdiktiń irgesin sókpeýdiń, halyq birligin saqtaýdyń maqsatyn aıqyndap berdi.
San ǵasyrlyq tarıhy bar halqymyz óziniń elin ártúrli basqynshylardan qorǵaǵan, birtutas el bolýdyń qadamdaryn jasaýmen bolǵan. Tipti, áleýmettik teńsizdiktiń kórinisterine shydamdylyqpen, sabyrlylyqpen qarap, bolashaqta halqymyz dara jolǵa túsetinine sengen. Sondyqtan halyqtyń kúshi árýaqytta onyń birliginde jáne aqıqat jolymen júrýge talpynysynda ekenin umytpaǵanymyz jón. Talaı adal uldary men qyzdary bar, áleýeti joǵary elimizdiń kóp ult ókilderi ómir súrip jatqan keńistigi óziniń jarqyn keleshegine senimmen qaraıdy degen oıdamyz. Bolashaq Qazaqstan áleýmettik ádilettilik pen rýhanı qundylyqtardy izdegen qýatty jáne órkenıetti elge aınalatynyna senimdimiz.