Memleket basshysy, QHA tóraǵasy Qasym-Jomart Toqaevtyń tóraǵalyǵymen ótip jatqan Assambleıanyń HHHİ sesıasynda belgili ǵalym Dıhan Qamzabekuly ulttyq uıysýdaǵy mańyzdy qaǵıdattarǵa toqtaldy.
Birinshi qaǵıdat – eldik, memleketshildik. Álemdik parasat óresinde ult pen memleket – bir uǵym. Jańa Qazaqstan úshin basty baǵyt – «túrli kózqaras – birtutas ult» deńgeıi. El men jer tutastyǵy da osynyń ishinde. Árıne, buǵan birinshi kezektegi jaýapty – qazaq jurty. Eldi tutastyratyn qazyqqa aınalý úshin ashyqtyqtyń, beriktiktiń, memleketshildiktiń ónegesi bolýǵa tıispiz.
«Árbirimiz belgili bir otbasynda ómirge keldik, belgili bir ortada óstik. Biraq kele-kele qoǵam qaınaýynda eldik qundylyqtardy sińirdik, joǵary bilim alyp, jetildik. Bizdiń bir kezdegi otbasy men ortada alǵan tálimimiz Otan men memleket múddesine deıin kóterildi», – dedi D. Qamzabekuly.
Ekinshi qaǵıdat – qoǵamnyń joǵary mádenıeti. Qazaqstan halqy Assambleıasy muraty turǵysynan aıtqanda, ár etnostyń kostúmi, dám máziri – etnostanýdyń bergi jaǵy ǵana. Onyń arǵy jaǵy nemese tereńi – ár etnos ǵulamalarynyń danalyǵyn, fılosofıalyq oı-tolǵamdaryn bilý, túısiný jáne nasıhattaý. «Taýlardy alasartpaı, dalany asqaqtatýdyń» máni osynda. Ǵalymnyń aıtýynsha, osynyń bári - Jańa Qazaqstan qoǵamyn úılestirýshi kúsh, joǵary mádenıet ózegi.
Úshinshi qaǵıdat – eńbek qundylyǵy jáne bardy uqsatý. Qazaqstan qoǵamy istiń kózin tabatyn kásibılikke, el eńsesin kóteretin jumysqa, bilikti mamandarǵa zárý.
«Qyzylordada jańa ǵasyr aýylyn jasaǵan Abzal Erálıev pen Aqmolada «Rodına» agrofırmasy aıasynda zamanaýı selo qalyptastyrǵan Ivan Saýer tájirıbesi – kópke úlgi. Árbir salada, árbir iste, ásirese, soltústik óńirler men shekaralyq aımaqtarda, taǵdyry aýyr monoqalalarda osyndaı bastamashyldyqty yntalandyrýymyz kerek», – dep túıindedi óz oılaryn ǵalym.