Eki el arasyndaǵy dostyǵymyzdyń taǵy bir nyshany bolary sózsiz.
Grýzıa astanasynda Abaı Qunanbaıulyna eskertkish ornatyldy. Onyń ashylý saltanatyna QR Indýstrıa jáne ınfraqurylymdyq damý mınıstri Qaıyrbek Óskenbaev qatysty, dep habarlaıdy Almaty-akshamy.kz vedomstvonyń baspasóz qyzmetine silteme jasap.
Atalǵan is-shara Qazaqstan men Grýzıa arasyndaǵy dıplomatıalyq qarym-qatynastardyń ornaǵanyna 30 jyl tolýyna oraı uıymdastyryldy.
«Bul eki el arasyndaǵy dostyǵymyzdyń taǵy bir nyshany bolary sózsiz. Abaı murasy tek bizdiń elimiz úshin ǵana emes, búkil adamzat úshin zor qundylyq bolyp tabylady. 2020 jyly biz Uly Abaıdyń 175 jyldyq mereıtoıyn atap óttik. Kórsetilgen osynaý qurmet úshin Grýzıa Úkimeti men halqyna alǵys aıtamyn» , – dedi Qaıyrbek Óskenbaev.
Tbılısıge jumys saparymen barǵan mınıstr Grýzıanyń Vıse-premeri, Ekonomıka jáne turaqty damý mınıstri Levan Davıtashvılımen kezdesti. Kelissózder barysynda kólik, aqparattyq tehnologıalar jáne ınovasıalar salasyndaǵy saýda-ekonomıkalyq yntymaqtastyqty damytý perspektıvalary sıaqty mańyzdy máseleler qozǵaldy.
Qaıyrbek Óskenbaevtyń aıtýynsha, Qazaqstan men Grýzıa arasyndaǵy saýda qatynastaryn ulǵaıtýda aıtarlyqtaı áleýet baıqalady. Mınıstr búgingi tańda qazaqstandyq kompanıalar metalýrgıa, munaı-hımıa, tamaq jáne mashına jasaý salalarynda óńdelgen taýarlarynyń Grýzıaǵa eksportyn arttyrýǵa daıyn ekenin atap ótti. Olardyń qatarynda farmasevtıka men qurylys salasy da bar.
Sondaı-aq, mınıstr Grýzıanyń Qorǵanys mınıstri Býrchýladze Djýanshermen kezdesip, saýda-ekonomıkalyq yntymaqtastyq jónindegi úkimetaralyq komısıa otyrysynyń jumysyna qatysýdy josparlap otyr.