Almaty qalasynyń ákimi Darhan Satybaldy jumys sapary kezinde megapolıstiń mádenı ınfraqurylymyn damytýǵa baılanysty negizgi jobalardyń oryndalý barysyn tekserip shyqty, - dep habarlaıdy Aqshamnews.kz.
Qala basshysy halyq mýzykalyq shyǵarmashylyǵyn, qazaq rýhanı mádenıeti men fólkloryn saqtaýǵa jáne damytýǵa arnalǵan elimizdegi jalǵyz mádenı nysan – «Alataý» dástúrli óner teatrynda boldy. Qaıta jóndeý aıasynda munda qasbetti jańartý, tozǵan oryndyqtardy aýystyrý, órtke qarsy jabyndy tóseý, sondaı-aq ártisterdiń ótinishi boıynsha sahnany jańǵyrtý josparlanýda.
Darhan Satybaldy Alatau Sreative Hub kitaphanasyna erekshe nazar aýdardy. Mádenı oryn turǵyndardyń kitap oqıtyn ortalyǵy jáne Alataý aýdanynyń mádenı alańy men kovorkıng ortalyǵynyń qyzmetterin biriktiredi.
Búginde Alatau Creative Hub-ta 25 tegin shyǵarmashylyq úıirme, mýltımedıalyq art-stýdıa jáne IT-zerthana jumys isteıdi. Jyl saıyn kitaphanaǵa 430 myńnan astam adam keledi. Bıylǵy jyldyń qyrkúıek aıynan bastap kitaphana táýlik boıy jumys kestesine kóshti. Erekshe qajettilikteri bar kelýshiler úshin jumys oryndary aýdıo sıgnalǵa jáne braıl dıspleıine arnalǵan baǵdarlamalyq-apparattyq quraldarmen jabdyqtalǵan, radıojıilikti sáıkestendirýdiń RFID-júıesi engizilgen.
Jumys saparyn qorytyndylaǵan Darhan Satybaldy Almatynyń mádenı oryndary qala turǵyndarynyń kúndelikti ómiriniń ajyramas bóligi retinde damýǵa tıis ekenin atap ótti.
«Bizdiń mindetimiz – tarıhı eskertkishterdi saqtap qana qoımaı, turǵyndar men jastar úshin jańa mádenı múmkindikter ashatyn zamanaýı sáýlet ortasyn qurý», - dep atap ótti ákim.