Úkimette «KAZAKH INVEST» kompanıasynyń bir jylǵy jumysy qaraldy.
2021 jyldyń qorytyndysy boıynsha, Qazaqstanǵa tikeleı sheteldik ınvestısıalar kólemi pandemıaǵa deıingi deńgeıge jetti. Bul týraly Úkimet basshysy Álıhan Smaıylovtyń tóraǵalyǵymen ótken «KAZAKH INVEST» ulttyq kompanıasy» AQ dırektorlar keńesiniń otyrysynda aıtyldy, dep habarlaıdy Almaty-akshamy.kz.
Otyrysta kompanıanyń 2021 jylǵy qyzmetiniń qorytyndylary qaraldy, 2021 jylǵa arnalǵan qarjylyq esep aldyn ala maquldandy. Sondaı-aq Esep saıasaty jáne Qarjy resýrstaryn basqarý saıasaty sekildi jańa redaksıadaǵy birqatar ishki qujattar bekitildi. İshki aýdıt qyzmetiniń jáne Sybaılas jemqorlyqqa qarsy komplaens-qyzmetiniń 2022 jylǵy İ toqsandaǵy esepteri qaraldy.
Basqarma tóraǵasy Meıirjan Iýsýpovtyń aıtýynsha, «KAZAKH INVEST» kompanıasynyń qoldaýymen 2021 jyly 5 myń jumys ornyn qura otyryp, 3,8 mlrd dollardan astam somaǵa 57 joba iske asyryldy. Óndiristik alańdardy aralaýmen sheteldik ınvestorlardyń Qazaqstan óńirlerine 190-nan astam sapary uıymdastyryldy. Olardyń aıasynda memlekettik organdarmen jáne jergilikti bıznes ókilderimen kelissózder júrgizildi.
2021 jyldyń qorytyndysy boıynsha, Qazaqstanǵa tikeleı sheteldik ınvestısıalardyń jalpy aǵyny pandemıaǵa deıingi deńgeıge jetip, 23,7 mlrd dollardy qurady.
El basshylyǵynyń tapsyrmasy boıynsha QR aýmaǵynda halyqaralyq kompanıalardyń óndirisin jergiliktendirý maqsatynda keń aýqymdy jumys júrgizilip jatyr. Álemniń 30-ǵa jýyq elinen shıkizattyq emes salalardyń 200-den astam kompanıasyna ınvestısıalyq usynys-paketter joldandy. Múddeli kompanıalarmen belsendi túrde kelissózder júrgizilip jatyr.
Sondaı-aq QR Premer-Mınıstrine «KAZAKH INVEST» kompanıasynyń sheteldegi ókilderiniń qyzmetiniń nátıjeleri týraly baıandaldy. Sheteldegi ókilder jumysynyń tıimdilik kórsetkishteri jyl saıyn Premer-Mınıstrdiń orynbasary – Syrtqy ister mınıstri Muhtar Tileýberdi tóraǵalyq etetin keńeste qaralady. Bul baǵyttaǵy jumys sheteldik ókilder bar óńirlerde pandemıalyq shekteýlerdiń birtindep alynýynyń nátıjesinde jandanyp jatqany atap ótildi.