Fýtboldan 2024 jylǵy Eýropa chempıonatynda búgin, 10 shildede 1/2 fınaldaǵy ekinshi oıynda Anglıa men Nıderland quramalary kezdesedi, dep habarlaıdy almaty-akshamy.kz.
Kezdesý saǵat 00.00-de bastalyp, «Qazaqstan» telearnasynan tikeleı efırde kórsetiledi. Kezdesý Dortmýnd qalasyndaǵy «Sıgnal Idýna Park» stadıonynda ótedi.
S tobynda synǵa túsken Anglıa Serbıany 1:0 esebimen jeńse, Danıamen 1:1, Slovenıamen 0:0 esebimen teń oınady. Anglıalyq fýtbolshylar 1/8 fınalda Slovakıany qosymsha kezeńde 2:1 esebimen súrindirdi. 1/4 fınalda Shveısarıamen negizgi kezeńde 1:1 esebimen teń túsip, penaltıler serıasynda 5:3 esebimen jeńip ketti.
Nıderland D tobynda Polshany 2:1 esebimen jeńip, Aýstrıaǵa 2:3 esebimen ese jiberse, Fransıamen 0:0 esebine qanaǵat bildirdi. 1/8 fınalda olar 3:0 esebimen Rýmynıanyń osal tusyn tapsa, shırek fınalda túrkıany 2:1 esebimen tize búktirdi.
Eki qurama buǵan deıin 22 márte kezdesip, 6-da Anglıa, 7-de Nıderland basym tússe, qalǵanynda teń nátıje tirkeldi.
Eske salsaq, budan buryn Ispanıa 12 jyldan keıin Eýropa chempıonatynyń fınalyna shyqty.