«Almaty» ÁKK» AQ enshiles uıymy – «Almaty Fınans» JSHS Almaty qalasynda kún panelderin shyǵaratyn zaýyt salýǵa 500 mln. teńge bóldi, dep habarlaıdy almaty-akshamy.kz.
«Almaty Business Development Company» Almaty qalasynyń bıznesti damytý kompanıasy» JSHS súıemeldeýimen ınvestısıalyq joba «Inovasıalyq tehnologıalar parki» arnaıy ekonomıkalyq aımaǵynyń aýmaǵynda iske asyrylatyn bolady.
Aýdany shamamen 2,5 myń sharshy metr bolatyn kásiporyn jyl saıyn 250 000 kún modýlin shyǵarady. Bir modýldiń qýaty 550-600 Vatt bolady. Kásiporynnyń iske qosylýy aǵymdaǵy jyldyń jeltoqsan aıyna josparlanǵan.
Zaýytqa kredıt berýdi «Almaty Business-2025» kásipkerlikti damytýdyń óńirlik baǵdarlamasy sheńberinde «Altyn Group» JSHS júzege asyrady. Kredıttik lımıt boıynsha syıaqy stavkasy 6%, qarjylandyrý merzimi - 7 jyldy quraıdy. «Almaty Fınans» qaryz qarajatyn eskere otyryp, ınvestısıalardyń jalpy somasy 2,1 mlrd. teńgeden asady.
Jobanyń maqsaty – jańartylatyn energetıkany damytý jáne eldegi kún panelderine ósip kele jatqan suranysty qanaǵattandyrý.
«Jobany iske asyrý barysynda qazaqstandyq jumysshy jáne ınjenerlik-tehnıkalyq quram sheteldik mamandardan tehnologıalyq proses týraly bilimderin arttyrady, bul jergilikti kadrlardyń biliktiligin arttyrýǵa jáne jańa óndiriste jumystaryn jalǵastyrýǵa qajet bilim men daǵdylardy meńgerýge múmkindik beredi. Kásiporynda barlyǵy 87 jumys orny ashylady», - dedi «Almaty Finance» JSHS Basqarma tóraǵasynyń orynbasary Juldyz Igenov.
Anyqtama úshin:
«Almaty» áleýmettik-kásipkerlik korporasıasy» AQ – damý ınstıtýty, memleket resýrstary men bıznes arasyndaǵy kópir. «Almaty» ÁKK qyzmeti turaqty jeke kásipkerlikti damytý jaǵdaıynda qalanyń áleýmettik, bilim berý, mádenı máselelerin sheshýge baǵyttalǵan.
«Almaty Finance» JSHS — kredıttik uıym, «Almaty» áleýmettik-kásipkerlik korporasıasy» AQ enshiles kompanıasy bolyp tabylady. «Almaty Finance» JSHS Almatydaǵy SHOB sýbektilerine jyldyq 2% nemese 6% stavka boıynsha jeńildikti qarjylandyrýdy usynady. Kredıt berýdiń maqsaty – jańa óndirister qurý jáne aınalym qarajatyn tolyqtyrý. Qaryzdyń eń joǵary somasy – 500 mln teńge. Merzimi – 7 jylǵa deıin. «Almaty Finance» kredıt berý baǵdarlamasy «Almaty BUSINESS-2025» aıasynda júzege asyrylýda.
«Almaty Business Development Company» Almaty qalasynyń bıznesti damytý kompanıasy» JSHS - qyzmeti jeke kásipkerlikti damytýǵa jáne qalanyń áleýmettik mańyzdy mindetterin sheshýge baǵyttalǵan uıym. Otandyq jáne sheteldik kásipkerler men ınvestorlar úshin «biryńǵaı tereze» qaǵıdatyn ınvestısıa tartýdan bastap daıyn jobany súıemeldeýge deıin iske asyratyn operator.