«Bastaý» kınofestıvali aıasynda «Arman» kınoteatrynda Maks Akbarovtyń «Dala» atty fılminiń qazaqstandyq premerasy ótti. Ataqty prodúser jáne akterdiń debúttik rejıserlik jumysy Bastau Debuts baıqaýyna qatysýda.
Kartına Qazaqstan dalasyndaǵy brakonerlermen kúreske túsken tabıǵatty qorǵaý ınspektorlarynyń oqıǵasyn baıandaıdy. Fılm 2019 jyly brakonerlermen arpalysta erlikpen qaza tapqan ınspektorlar Erlan Nurǵalıev pen Qanysh Nurtazınovty eske alýǵa arnalǵan, dep habarlaıdy almaty-akshamy.kz.
Fılm kóp ýaqyttan beri halyqaralyq kórmelerdi aralap júr – «Dalany» búkil álem boıynsha 20-ǵa jýyq kınofestıvaldiń kórermenderi baǵalap úlgerdi. Ázirshe avtorlardyń qorjynynda 11 júlde bar. Endi mine kıno otandyq kıno súıer qaýymǵa da jetti.
«Bul áleýmettik mańyzy bar fılm, biz ony kınofestıvalderge barady dep oılaǵan joqpyz. Túsirilimniń ózi óte qyzyqty, erekshe boldy, ásirese men úshin – sebebi bul meniń rejıserlik debútim. Qıyn sátter de boldy, biz qysta mınýs 47 gradýsta túsirdik, boran boldy, dalada birneshe saǵatqa akterlarymyz adasyp ketti. Jazda plús 50-de túsirildi, onǵa jýyq kólik buzyldy. Ekshn kóp boldy. Osyndaı ekstremaldy kadrlardyń arqasynda biz Londondaǵy «International MOTOR AWARDS» kınofestıvaline qatystyq, onda sońǵy «Forsajben» «úzdik kaskaderlik trúkter» nomınasıasynda boldyq», - dedi debútant Maks Akbarov.
73 mınýttyq qysqa hronometrajǵa qaramastan, kartınada óte myqty akterlik quram. Kadrdyń ár sharshy metri úshin Dáýren Serǵazın, Erjan Túsipov, Tólepbergen Baısaqalov, Erbolat Alkoja, Nyshanbek Jubanaev, Sergeı Ýfımsev, Erjan Jarylqasynuly, Seıdýlla Moldahanov jáne ataqty reseılik akter Sergeı Garmash sekildi tanymal akterler kúresedi.
Basty róldi oryndaýshy Seıdýlla Moldahanov túrli kınofestıvalderde úsh marapatqa ıe boldy, al Akbarovtyń ózi qazan aıynyń basynda XV Tashkent halyqaralyq kınofestıvalinde «Úzdik debút» júldesine ıe boldy.
Týyndy Aqmola jáne Qostanaı oblystarynda túsirilgen, onyń búdjeti shamamen 180 mıllıon teńgeni quraıdy. Fılm kelesi jyly prokatqa shyǵady dep kútilýde.
Al 14 jeltoqsan kúni keshke festıvál qonaqtaryn taǵy eki qazaqstandyq premera – Dáýletjan Mahmuttyń «Globýs» jáne Narıman Týrebaevtyń «Ol shaınekti satyp aldy» fılmderi jáne Aısultan Seıitovtyń «Qash» fılminiń arnaıy kórsetilimi kútedi.
Festıvál dástúrli túrde Tanaris Production jáne A-Team kınokompanıalarymen Almaty qalasy ákimdiginiń jáne QR Mádenıet jáne aqparat mınıstrliginiń qoldaýymen uıymdastyrylady.
