Búgin fýtzaldan Qazaqstan ulttyq quramasy 2024 jylǵy álem chempıonatynyń elıtalyq irikteý kezeńindegi kezekti týr oıynyn ótkizedi.
Jerlesterimiz bul joly elordadaǵy Jaqsylyq Úshkempirov atyndaǵy jekpe-jek saraıynda Nıderland quramasymen sheberlik baıqasady. İrikteý kezeńinde bizdiń jigitter Rýmynıa, Ázerbaıjan jáne Nıderland quramalarymen birge «A» tobynda óner kórsetip jatyr, dep habarlaıdy almaty-akshamy.kz. Tórt týrdan keıin Qazaqstan fýtzalshylary 12 upaımen topta kósh bastap tursa, Nıderland quramasy 1 upaımen tórtinshi orynda keledi. Aıta keteıik, ulttyq qurama eýropalyq reıtıńte – 4-shi, álemdik reıtıńte – 7-orynǵa jaıǵasqan. Jaýapty mach qarsańynda Týrızm jáne sport mınıstri Ermek Marjyqpaev ulttyq quramanyń jattyǵýyna qatysyp, fýtzalshylarǵa qoldaý bildirdi. Al quramanyń bas bapkeri Kaka aldaǵy machqa jigitterdiń daıyndyǵy joǵary deńgeıde, jaýyngerlik kóńil-kúıde ekenin aıtty.
«Fýtzaldan Qazaqstan quramasy álemdegi eń úzdik komandalardyń biri sanalady. Ótken álem chempıonatynda Qazaqstan 4-orynǵa ıe bolsa, 2016 jylǵy Eýropa birinshiliginde bizdiń jigitter qola júldeger atanǵan edi. Aldaǵy machta ulttyq quramaǵa tek jeńis tileımin! Óz alańymyzdaǵy dál osy básekede kelesi jylǵy álem chempıonatyna joldama alamyz degen senimdemin», - dedi Ermek Marjyqpaev.
Fýtzaldan álem chempıonatynyń elıtalyq irikteý kezeńi 14-20 jeltoqsan aralyǵynda eki machpen aıaqtalady. Osy machtardyń birinde Qazaqstan quramasy jeńiske jetetin bolsa, 2024 jylǵy 14 qyrkúıek pen 6 qazan aralyǵynda Tashkentte (Ózbekstan) ótetin álem chempıonatynyń fınaldyq kezeńine birinshi orynmen tikeleı joldama alady.
