Forýmda balalar onkologıasy men gematologıasy salasyndaǵy ózekti máseleler talqylandy
2023 jylǵy 11-12 mamyrda QR balalar onkogematologıa qyzmetiniń 30 jyldyǵyna arnalǵan «Balalar onkogematologıalyq qyzmetiniń damýyna 30 jyl: jetistikteri men bolashaǵy» atty halyqaralyq ǵylymı-tájirıbelik konferensıa ótti, dep habarlaıdy Almaty-akshamy.kz.
Onlaın jáne oflaın túrinde ótken konferensıa jumysyna Germanıa, Túrkıa, Reseı, Belarýsıa, Ózbekstan, Latvıa, Ýkraına, Tájikstan jáne t.b. shet eldiń jetekshi mamandary, Astana jáne Almaty qalalaryndaǵy eki respýblıkalyq ǵylymı ortalyqtyń balalar onkologıasy men gematologıa salasynyń mamandary, oblystyq onkologtar men gematologtar, úkimettik emes uıymdar men ata-analar qaýymdastyǵynyń ókilderi, barlyǵy 500-den astam maman qatysty.
Konferensıanyń basty maqsaty – balalar jasyndaǵy onkologıalyq jáne gematologıalyq aýrýlardy dıagnostıkalaý men emdeýdiń búgingi ózekti máselelerin talqylaý, halyqaralyq jáne óńiraralyq yntymaqtastyqty damytý, balalardaǵy onkologıalyq aýrýlardy erte dıagnostıkalaý jáne emdeý qajettiligi týraly eskertý maqsatynda kúsh-jigerdi biriktirý.
Halyqaralyq konferensıa Qazaqstan Respýblıkasynyń Densaýlyq saqtaý vıse-mınıstri Vácheslav Dýdnıktiń, S.J.Asfendıarov atyndaǵy QazUMÝ-dyń rektory Marat Shoranovtyń, Valentın Geraın qorynyń negizin qalaýshy, Qazaqstandaǵy balalar onkogematologıa qyzmetiniń qalyptasýyna zor úles qosqan Geraın Valentın myrzanyń jáne Pedıatrıa jáne balalar hırýrgıasy ǵylymı ortalyǵynyń Basqarma tóraǵasy Abaı Qusaıynovtyń alǵy quttyqtaý sózimen ashyldy.
«Balalardyń qaterli dertpen naýqastanýy qoǵam úshin aýyr áleýmettik jáne qarjylyq aýyrtpalyq qana emes, sonymen qatar ár adamnyń; analardyń, balanyń týǵan-týysy, dárigerler men medısına qyzmetkerleriniń júregin syzdatatyn tragedıa. Uzaq ýaqyt boıy, búkil álemde jáne elimizde qaterli dertke shaldyqqan balalardyń barlyǵy derlik qaıtys bolatyn. Sondyqtan 30 jyl buryn Pedıatrıa jáne balalar hırýrgıasy ǵylymı ortalyǵynyń bazasynda «KER-Germanıa» qaıyrymdylyq qoǵamynyń belsendi kómegimen Respýblıkalyq balalar onkogematologıalyq ortalyǵyn uıymdastyrý týraly sheshim qabyldandy. Kóp jyl boıy memleket tarapynan onkogematologıalyq aýrýlary bar balalarǵa kómek kórsetý máselelerine basa nazar bólinip keledi. Onkologıalyq jáne gematologıalyq aýrýlary bar balalar dıagnostıka men emdeýdiń klınıkalyq hattamalaryna sáıkes barlyq dárilik zattarmen, onyń ishinde ambýlatorıalyq kezeńde respýblıkalyq búdjet esebinen qamtamasyz etiledi. Astana qalasyndaǵy Ana men bala ulttyq ǵylymı ortalyǵynda onkologıa jáne gematologıa bólimsheleri ashyldy. Gemopoezdik diń jasýshalaryn transplanttaý tehnologıalary sátti engizildi, QR-da balalar onkologıalyq jáne gematologıalyq kómegin jetildirý boıynsha jol kartalary ázirlenip, iske asyryldy. Bıyl onkologıalyq aýrýlarmen kúres boıynsha keshendi is-sharalar jospary ázirlendi. Sondaı-aq Densaýlyq saqtaý mınıstrligi erte dıagnostıka, mamandandyrylǵan emdeýdi jetildirý, joǵary tehnologıalyq qyzmetter spektrin keńeıtý, kadrlyq áleýetti jetildirý jáne ǵylymdy damytý jónindegi is-sharalardy iske asyrýdy kózdep otyr», – dedi Densaýlyq saqtaý vıse-mınıstri V.Dýdnık.
Forým alańynda balalardyń qaterli isigin, qan aýrýlaryn emdeý salasyndaǵy ózekti taqyryptardyń keń aýqymy, balalyq shaqtaǵy onkologıalyq jáne gematologıalyq aýrýlardy dıagnostıkalaý men emdeýdegi zamanaýı tásilder, balalar onkologıasy men gematologıasyndaǵy hırýrgıanyń zamanaýı múmkindikteri, onkogematologıalyq qyzmetti uıymdastyrý jáne t.b. balalar onkologıasy men gematologıasy salasyndaǵy ózekti máseleler talqylandy.