QR Prezıdenti Qasym-Jomart Toqaev 2022 jyldy «Balalar jyly» dep jarıalaǵan bolatyn. Osyǵan oraı Túrkıa Respýblıkasy «TÜRKTAV» Túrki mádenıeti jáne tarıhy qory Almaty qalasy Ortalyqtandyrylǵan kitaphana júıesimen birlese otyryp, «Balalar kitaphanasy qyzmeti nusqaýlyǵy» atty kitaptyń tanystyrylymyn uıymdastyrdy.
Oqýlyq avtory Hadjettepe ýnıversıtetiniń aqparat jáne derekterdi basqarý bóliminiń oqytýshysy profesor Búlent Iylmaz. Kitap halyqqa ashyq túrde qyzmet kórsetetin balalar kitaphanasynda eńbek etetin kitaphanashylarǵa kitaphananyń is-áreketi men qyzmetteri jóninde jol kórsetý jáne járdem berý maqsatynda daıyndalǵan.
Búlent Iylmaz - birneshe ǵylymı kitaptar men maqalalardyń avtory. Túrli halyqaralyq jáne ulttyq ǵylymı jýrnaldardyń saraptama alqasy múshesi.
Túrkıa Respýblıkasy «TURKTAV» Túrki tarıhy jáne mádenıeti qory kóne dáýirden búginge deıingi túrki áleminiń tarıhyn, tili men ádebıetin jáne mádenıetin zerttep, Ulttyq jáne halyqaralyq deńgeıdegi jobalar arqyly túrki halyqtarynyń mádenı jady men tarıhı murasynyń qundylyqtaryn bolashaq urpaqqa jetkizýdi maqsat tutady. Qor kóptegen halyqaralyq uıym jáne mekemelermen yntymaqtastyq týraly kelisimshartqa qol qoıyp, Túrki halyqtarynyń ádebıeti, tili, tarıhy, mádenıeti salalarynda birneshe kitaptardy túrik tilinde basyp shyǵaryp, kóptegen ǵylymı konferensıa, sımpozıým, kórme, semınarlar ótkizedi.
«Otyrar» elektrondyq kitaphanasy qordyń mańyzdy jobasy bolyp tabylady. Búginde kitaphana qorynda 100.000-nan astam túrkologıaǵa baılanysty kitaptar bar.
Almaty qalasy Ortalyqtandyrylǵan kitaphana júıesi basqarmasymen ortaq jobalar bar. Aıta ketelike ústimizdegi jyldyń mamyr aıynda «TURKTAV» qory 500-ge jýyq túrik tilinde shyqqan balalar ádebıetin Qazaqstandaǵy balalar kitaphanalaryna tartý etpek, sondaı-aq, Túrkıa Respýblıkasynyń Almatydaǵy Bas Konsýldyǵynyń qoldaýymen túrik tilin úıretetin tegin kýrstar ashpaq.