Mamandar kemshilikterdi der kezinde joıýǵa múddeli.
Jyl basynan beri Medısınalyq saqtandyrý qoryna almatylyqtardan 1 018 shaǵym tústi. Bul týraly qordyń Almaty qalalyq fılıalynyń dırektory Tileýhan Ábildaev málim etti, dep habarlaıdy Almaty-akshamy.kz.
Onyń aıtýynsha, túsken ótinishtiń basym bóligi medısınalyq kómektiń sapasy men konsýltasıalyq-dıagnostıkalyq qyzmetti kútý merziminiń uzaqtyǵyna, kómek kórsetýden bas tartý máselesine qatysty.
Shaǵymdar qordyń fms.kz resmı saıty, 1406 baılanys ortalyǵy, Qoldau 24/7 mobıldi qosymshasy arqyly túsken.
«Pasıentterdi qoldaý jáne ishki aýdıt qyzmeti bas dárigerge baǵynady. Onyń mindeti - qyzmet kórsetý sapasyn jaqsartý. Sol sebepti aýdıt qyzmeti medısınalyq kómektiń pasıentterge tolyqqandy ári sapaly kórsetilýin qamtamasyz etýge, kemshilikterdi anyqtap, der kezinde joıýǵa múddeli», - deıdi fılıal basshysy Tileýhan Ábildaev.
Ol qandaı jaǵdaıda pasıentterdi qoldaý qyzmetiniń kómegine júginýge bolatynyn da atap ótti. Mysaly, shuǵyl kómek kórsetý úshin saqtandyrylǵan statýsyn talap etse, saqtandyrylmaǵandyqtan ýchaskelik dárigerdiń qabyldaýyna jazýdan bas tartsa, emhanaǵa tıesili aýmaqta tursańyz da ýchaskelik dáriger úıge kelip qaraýǵa kelispese, salalyq mamannyń joqtyǵyna baılanysty nemese aldaǵy bir aıda oryn joq degen jeleýmen dárigerdiń qabyldaýyna jazbasa, tıisti dıagnostıkalyq tekserýler men zerthanalyq qyzmetterge joldama berilmese, dáriger qabyldaǵan kezde dórekilik tanytsa, medısınalyq kómektiń sapasy kóńilden shyqpasa, qoıylǵan dıagnoz ben taǵaıyndalǵan emniń durystyǵyna kúmándanǵan jaǵdaıda, medısınalyq derekterden qate ketse nemese kórsetilmegen qyzmet «kórsetildi» dep jazylsa, jalpy, medısına qyzmetine kóńilińiz tolmasa jáne taǵy da basqa jaǵdaılarda ishki aýdıt qyzmetine júginýge bolady.