Qazaqstan Respýblıkasynyń Shanhaı Yntymaqtastyq Uıymyna tóraǵalyq etýi sheńberinde qorǵanys mınıstrleriniń keńesi ótti.
Oǵan SHYU-ǵa múshe memleketter qorǵanys vedomstvolarynyń basshylary, Bas hatshy, uıymnyń Óńirlik terorızmge qarsy qurylymy Atqarýshy komıtetiniń dırektory, sondaı-aq Belarýs Respýblıkasynyń Qorǵanys mınıstri qatysty, dep habarlaıdy Almaty-akshamy.kz Qorǵanys mınıstrligine silteme jasap.
Dástúrli dostyq pen syndarly únqatysý túrinde ótken keńeste halyqaralyq jáne óńirlik qaýipsizdiktiń ózekti máseleleri talqylanyp, qorǵanys vedomstvolary arasyndaǵy yntymaqtastyqty damytý qadamdary aıqyndaldy.
Keńeste SHYU-nyń áskerı-saıası blok emestigi, al áskerı saladaǵy ózara is-qımyl basqa elderge qarsy baǵyttalmaǵany atap ótildi.
Keńes qyzmeti áskerı saladaǵy senim sharalaryn nyǵaıtýǵa, óńirlik qaýipsizdiktiń syn-tegeýrinderi men qaterlerine qarsy is-qımyl jónindegi kúsh-jigerdi úılestirýge baǵyttalǵan. Osyǵan baılanysty «Beıbit mısıa» terorızmge qarsy birlesken áskerı oqý-jattyǵýlaryn ótkizýdi jalǵastyrý qajettigi atap ótildi.
Uıymǵa múshe memleketter qarýly kúshteriniń qyzmetin nasıhattaý maqsatynda qorǵanys vedomstvolarynyń basshylary áskerı-tarıhı murajaılar arasyndaǵy ózara is-qımyldy damytýǵa kelisti.
Qazaqstan qorǵanys vedomstvosynyń basshysy general-polkovnık Rýslan Jaqsylyqov qatysýshylardyń nazaryn Uıymnyń tarıhı aspektisine aýdardy.
«Eger SHYU-nyń bastaýyna qaıta oralsaq, onyń negizin 1996 jylǵy 26 sáýirdegi Shekara aýdanyndaǵy áskerı saladaǵy senimdi nyǵaıtý týraly kelisim (Shanhaı kelisimi) men 1997 jylǵy 24 sáýirdegi Shekara aýdanyndaǵy qarýly kúshterdi ózara qysqartý týraly kelisim (Máskeý kelisimi) qalaǵanyn atap ótken jón», – dedi ol.
Sonymen birge Qazaqstan Qorǵanys mınıstri uıym sheńberinde SHYU-nyń barlyq memleketteri úshin áskerı bólimderge erikti negizde ózara sapar jasaý, ótkizilip jatqan iri áskerı oqý-jattyǵýlar, qorǵanys vedomstvolarynyń basshylyǵy men qurylymy týraly aqparat berýdi kózdeı otyryp, senim sharalary týraly kelisimdi ázirleýdi jáne qabyldaýdy usyndy.
Keńes qorytyndysy boıynsha hattamaǵa, yntymaqtastyqty retteıtin birqatar qujattarǵa qol qoıylyp, birlesken komúnıke qabyldandy.
İs-shara sońynda Qazaqstannyń Qorǵanys mınıstri men Shanhaı Yntymaqtastyq Uıymynyń Bas hatshysy birlesken málimdeme jasady.