Qyrǵyz prezıdentiniń Birjan Qaldybaevqa arǵymaq syılaýy áleýmettik jelide alýan áńgimege arqaý boldy.
Budan buryn aıtys aqyndary men jyrshy - termeshiler odaǵy tóraǵasynyń birinshi orynbasary Amanjol Áltaevtyń pikirin usynǵanbyz.
Keshe osyǵan qatysty Qyrǵyz prezıdenti Amanjol Áltaevqa jaýap bergenin habarladyq.
Búgin sóz qadirin túsirmegen qazaqtyń qos aqynynyń Amanjol Áltaevty qoldaǵan pikirin usynamyz.
Aqyn, Halyqaralyq «Alash» ádebı syılyǵynyń laýreaty Ǵalym Jaılybaı óziniń FB paraqshasynda bylaı dep jazdy:
...Qyrǵyzǵa baryp "arnaý" aıtyp, qasıetti jyrdyń baıraǵyn bıik kótere almaǵan baýyrymyzǵa qaratyp aıtqan Amanjol Áltaevtyń syn pikirine baılanysty áleýmettik jelide túrli pikirler jazylyp jatyr. Bizdiń halyq tipti sóz uǵýdan qalǵan ba dep qaldym. Eskertpe, syn aıtýdyn da jón-jobasy, mádenıeti bolady. Qazaq aıtys óneriniń qaıtalanbas tulǵalarynyń biri, arda azamat, qaıratker inim Amanjol aıtsa " sóz arasy bóten sózben bylǵanbaǵanyn" qalaǵannan aıtty. Óleń-yrǵaq pen úılesimniń, obraz ben sýrettiń, uıqas pen sulýlyqtyń kóriginen shyqqanda ǵana óleń. Jaıaý keldim, baıaý keldim dep sydyrta berý kimge abyroı áperedi?
Amanjol bul jerde qazaq óleńiniń abyroıy úshin aıtyp tur. "Tulpar mingendi qyzǵandy" degen ne sumdyq? Sońyna ergen jigitke olja salyp, san tulpardy ózi de azamattarǵa mingizip júrgen joq pa? Amanjol baýyrymdy ǵumyr boıy biletin aǵasy retinde onyń janynyń jaryǵyn, tabıǵı darynyn, adamı qalybyn jaqsy túısinemin. San joq-jitikke kómek qolyn sozǵanyna da kýámin.
"Aqyn óltirý oıyny" oıyn bitkenniń jamany, ardaqty aǵaıyn! Pikir aıtarda saq bolaıyqshy!
Keshe ǵana 165 jyldyǵyn toılaǵan Máshhúr Júsip áýlıe bylaı degeni bar: " Burynǵy órnekti han, úlgili bılerdiń sózderin aıtýshy da taýsyldy, shyn qulaqpen tyndaýshy da taýsyldy. Endi sum jalǵannyń sumdyq sózi. El tozyǵy jetip,sózden azǵandyq belgisi - osy.
Qurttaı bala kúnimizde aq saqaldy qarıalar aıtyp otyrýshy edi:
- Aıtaıyn deseń, tyndaýshy joq; tyńdaıyn deseń, aıtýshy joq! - dep. "Qulaq estigendi kóz bir kórmek. "Sony, mine, biz bul kúnde kórip otyrmyz."
Iá, solaı...
Al tómendegi jazba QR Parlament Májilisiniń depýtaty, aqyn Janarbek Áshimjannyń FB paraqshasynan alyndy:
Amanjol Áltaı — astyndaǵy jalǵyz atyn túsip berip, júgen ustap qalatynnyń naǵyz ózi. Qanshama saparlarda birge júrmiz, qyzǵanyshtyń qyzyl ıtinen ada, "kisige bolsa eken" dep júretin jomart bolmysyna sát saıyn kýámiz.
Barmaqtaı kezinen atamura aıtys óneriniń damýyna damylsyz qyzmet etip kele jatqan Azamat!
Sóz ónerine kóleńke tússe janyn jalaý, Aryn alaý etetin Ǵalym!
Ulttyq murattardyń aýlasyna ury tússe atoılap shyǵatyn Qaıratker!
Aǵa-ini bolyp syılasyp júrgenimizge de on jyldan asa ýaqyt bolypty.
Óte baısaldy, ustamdy, mádenıetti.
Bolmysy názik kóringenimen, ádiletsizdikke, qaraýlyqqa jany tózbeıdi.
Kesip, piship týrasyn aıtady.
Al Aýjekeńniń áleýmettik jelide aıtqan aq-adal sózin oı-qyrǵa alyp qashyp "arnaý aıtqan jigitke mingizgen atty qyzǵanypty" dep aıyptaý — soqyrdan kóz, mylqaýdan til surapty degenmen birdeı ǵoı…
Qazaq jurty súıegine sóz sińgen halyq qoı.
Týra aıtpaq túgil emeýrinmen aıtylǵan sózdiń astaryndaǵy astań-kesteń aǵystaryn sezip, bilip, baǵa berip otyrady.
Al Qudaıshylyǵyna kelsek, keshegi sózdiń atasy ólip bara jatqanda aıtqan Aýjekeńniń syny da, tilegi de oryndy.