Ne baıqadyńyz?
Aýa raıyn boljaıtyn mamandardyń pikirinshe, aldaǵy kúnderi qalyń qar jaýady. Kóktaıǵaq bolady. Mundaıda, árıne, adamdardyń qaýipsizdigi mańyzdy.
«Jumystan qalatyn boldyq qoı...»
Qazir tústen keıin oqıtyn tómengi synyp oqýshylaryn muǵalimderi erte qaıtaryp júr. Sýyqta aıaldamada turyp tońyp qalmasyn deıdi. Al soltústik oblystarda tipti bastaýysh synyp oqýshylary onlaın-oqýǵa kóshken de bolar mynadaı aýa raıynda.
Álginde aýyldan Almatyǵa qatynaıtyn avtobýsta kele jatyrmyz. Avtobýs jol boıymen aqyryn júrip keledi. Bir jolaýshy áıel:
– Tezirek júrseńizshi, jumystan qalatyn boldyq qoı, – dep ashý shaqyrdy.
– Men óz aýanymmen, óz ýaqytymmen kele jatyrmyn, budan artyq júre almaımyn, kórip tursyzdar, jol taıǵaq. Jol amandyǵy, jolaýshylardyń amandyǵy kerek, – dedi júrgizýshi.
Bir kezde avtobýs júrgizýshisine dıspecher qyz habarlasty. Daýysy bárimizge estilip tur.
– Qaıyrly kún! Aldyńyzda kele jatqan «143» (avtobýs nómiri bolar) synyp qaldy, qazir sońǵy núktege jetken kezde, keri qaıta shyǵarsyz. Artyńyzdan kele jatqan avtobýs ta toqtap qaldy, – dedi.
– Jaqsy, qabyldandy, – dedi júrgizýshi. – Áne, sizder tez júrmediń deısizder, tań atpaı jatyp eki avtobýsymyz synyp qalypty jolda. Myna aýa raıy ońaı tımeıin dep tur qaı-qaısysymyzǵa da. Qar túnimen jaýdy.
Aq qar, kók muzda...
Keshe keshke telearnadan jol-kólik mamandary sóılep jatyr eken. Qulaq túrdim. «Áleýmettik jelide tarap júr» dep bir vıdeony kórermen nazaryna usyndy. Onda respýblıkalyq mańyzy bar úlken jolda «ary qaraı júrýge bolmaıdy, jol jabyq, qar basyp qalǵan» degen úsh polıseıdi tyńdamaı, jolǵa shyqqan er adamdar «eı, ıterme meni, jiber, ótkiz bizdi» dep qoqańdap tur. Al qazir «aqyry onlaın oqýdasyń ǵoı» dep kólikterine bala-shaǵasyn salyp alyp jolǵa shyǵatyndar da qaýipsizdikti oılamaıdy. «Taksıster de bir kúnde eki-úsh reıs jasap tastaýymyz kerek dep jantalasyp, jol qaýipsizdigin eskermeıdi» dep shyryldap tur maman. Al ondaılardyń temir tulparynyń dóńgelegi kúrejolda syrǵanap, ekinshi kólikke soqtyǵysqanda baryp ókinip jatatynyn kúndelikti ómirde kórip júrmiz. Aq qar, kók muzda jolǵa shyǵyp, bala-shaǵasymen bir otbasy túgel opat bolyp jatqan jaǵdaılar da az emes.
Aınalaıyn, azamat eken!
Ótkende «Almaty tazalyq» mekemesinde jumys istep, kúndik nápaqasyn taýyp júrgen kóshe tazalaýshy eńbek adamdarymen sóıleskenimde, jumystarynyń, ásirese, qys mezilinde aýyr bolatynyn aıtyp qalǵan-dy. Shynymen de, biz áli jyly kórpeniń astynda uıyqtap jatqanda, olar tań qarańǵylyǵynan turyp, mynadaı aıazda qar kúrep, jolǵa tuz, qum seýip júredi. Bizdiń tańerteń aman-esen jumysqa, sabaqqa jetýimiz úshin jaǵdaı jasap júrgender.
Aıtpaqshy, ótkende áleýmettik jelide Almatynyń Arbatynda sol mańnan ótip bara jatqan júrginshi bir qazaq jigitiniń qyzǵylt sary jılet kıgen, qar kúrep jatqan bir áıeldiń qolyndaǵy kúregin alyp, qar kúrep júrgen vıdeosy tarap, júregimizdi bir tolqytqany bar-dy. Aınalaıyn-aı! Anasyndaı adamnyń beli búgilip, myna sýyqta qar kúrep júrgenine jany aýyryp ketken bolar. Álemdi sondaı meıirim, qaıyrym syndy bıik qasıetter ustap tur ǵoı negizi. Jáne de áıel-anaǵa degen qurmet qandaı!
«Almaty-akshamý», №4 (6297) 12 qańtar, 2023 jyl