Shaharymyzdyń Áleýmettik qyzmetter úıinde qalalyq Ardagerler keńesi, Almaty qalasy Jumyspen qamtý jáne áleýmettik baǵdarlamalar basqarmasy, qalalyq jáne aýdandyq «Belsendi uzaq ómir súrý» ortalyqtary ókilderiniń qatysýymen arnaıy jıyn ótti.
Basqosýdyń alǵashqy sóz kezegin alǵan qalalyq Ardagerler keńesiniń tóraǵasy Aqan Bıjanov qazirgi tańda Almatyda «Belsendi uzaq ómir súrý» respýblıkalyq baǵdarlamasynyń qalaı júzege asyp jatqany jaıynda baıandap berdi. Qalalyq Ardagerler keńesi tóraǵasynyń aıtýynsha, dál qazirgi tańda qalamyzdyń birneshe aýdanynda «Belsendi uzaq ómir súrý» ortalyqtarynyń jumysy jandana bastaǵan. Sonymen qatar, ortalyqtarda ardagerlerdi áleýmettik qoldaýǵa baǵyttalǵan sharalar kesheni júıeli túrde júzege asyrylyp jatyr.
– «Belsendi uzaq ómir súrý» baǵdarlamasynyń mańyzy zor. Qoǵamdaǵy kóptegen máselelerdi qamtıdy. Máselen, áleýmettik qamsyzdandyrý, bos ýaqytty tıimdi uıymdastyrý jáne taǵy basqa máselelerdiń júıeli júrgizilýine muryndyq bolyp otyr. Budan ózge, qazirgi kezde áleýmettik máselelerdi sheshý boıynsha qalamyzdyń búdjetiniń mólsheri ulǵaıa túsýde. Sondaı-aq, ardagerlerimiz belsene atsalysatyn «Shyńǵa órleý» baǵdarlamasyna da qosymsha aqshalaı qarajat bólinýde, – dep atap ótti Aqan Qusaıynuly.
Sonymen qatar, qalalyq Ardagerler keńesiniń tóraǵasy birlesken basqosýdyń taǵy bir mańyzdy mindeti – qolǵa alynyp jatqan jumystardyń jaı-kúıin taldap, atalmysh baǵdarlamany iske asyrý barysynda bolashaqta naqty josparlar kerek ekenin de naqtylap berdi. Kelesi kezekte qalalyq Jumyspen qamtý jáne áleýmettik baǵdarlamalar basqarmasynyń basshysy Nazıra Toǵyzbaeva «Belsendi uzaq ómir súrý» ortalyqtarynda zeınetkerlerdi QR zańnamalyq jáne normatıvtik-quqyqtyq aktilerimen tanystyryp, qarjylyq jáne kompúterlik saýattylyq, banktik jáne basqa da máseleler boıynsha sabaqtar ótkizetinin, ınternet pen WhatsApp-ty qalaı paıdalaný kerektigin úıretetinin jetkizdi. Qalamyzda ashylǵan «Belsendi uzaq ómir súrý» ortalyqtarynda úıirmeler men túrli klýbtar jumys jasaıdy. Sonymen qatar, hor, bı, vokal, dombyra úıretý, kıno súıerler klýby, sándik-qoldanbaly shyǵarmashylyq, sýret salý, qolóner, keskindeme, músin jáne grafıka baǵytyna baýlıtyn úıirmeler bar. Buǵan qosa, zeınetkerlerdiń shet tilderin úırenýlerine de múmkindik jasalǵan. Tipti, álem murajaılaryna vırtýaldy túrde saıahattar da jasaýǵa bolady.
Osynaý jumystardyń júıeli túrde iske asýyna tek qalalyq ákimshilik qana emes, basqa da qurylymdyq salalar men qalamyzdyń ardagerleri belsendi túrde atsalysýda.
Jıyn sońynda arnaıy qaýly qabyldanyp, onda 2023 jyly qalamyzdyń Ardagerler keńesi uıymdary men « Belsendi uzaq ómir súrý» ortalyqtarynyń aldaǵy atqaratyn jumystarynyń naqty maqsattary belgilendi.
«Almaty-akshamý», №4 (6297) 12 qańtar, 2023 jyl