Almatyda múmkindigi shekteýli, erekshe kútimdi qajet etetin balalar tárbıelep otyrǵan 100-den astam áıel «Mama Pro» qoǵamdyq qorynyń qoldaýymen kásipkerlik salasynda bilim alyp shyqty.
Iá, dimkás bala tárbıeleý ońaı emes, ol úshin tózim, sabyr aýadaı qajet. Sondaı-aq, kúızeliske túsip ketpeı, ózin-ózi damytyp otyrýy kerek. Mine, olarǵa osy turǵyda «Mama Pro» qoǵamdyq qory kómekke keledi. Elimizde 2018 jyly negizi qalanǵan atalmysh áleýmettik osal topqa jatatyn áıelderdi qoldaý jáne damytý qory múgedek balalar tárbıelep otyrǵan analarǵa kásipkerlik salasyndaǵy zamanaýı bilim alýǵa kómektesedi.
Múmkindigi shekteýli balalardyń analary qor tarapynan baladan qol úzbeı, bıznesti ashý jáne júrgizý boıynsha zańdyq, psıhologıalyq jáne arnaıy keńes ala alady, sonymen qatar onlaın qatysýǵa da múmkindigi bar. Baladan qol úzbeı dep otyrǵanymyz, ata-analar túrli kýrsqa, semınarlarǵa qatysyp otyrǵanda, balalaryna tárbıeshiler qaraıdy. Iaǵnı alańdamaıdy. Sapaly bilimniń nátıjesinde erekshe balasy bar áıel-analardyń kóbi búginde jeke kásipke bet buryp, óz isin asha bastady.
– Qazir biz kásipkerlik negizderi kýrsynyń tórtinshi kýrsyn aıaqtadyq, Búginde túlekterimiz óz bıznes-ıdeıalaryn usynyp jatyr. Bul – áleýmettik kásipkerlik salasyndaǵy jobalar, serebraldy sal aýrýyna shaldyqqan balalarǵa arnalǵan ońaltý ortalyǵy, saýmoterapıa, keńse tehnıkasyn engizý, úıden pisirilgen torttar, tiginshilik, qazaq tilinde sheshendik óner kýrstary. Qordyń Almaty fılıaly 2019 jyly ashyldy. Osy ýaqyt aralyǵynda talaı otbasyna qýanysh syıladyq desek qatelespeımiz, – deıdi «Mama Pro Almaty» QQ fılıalynyń jetekshisi Elena Kım.
Iá, kýrs túlekteriniń 99%-y otbasyndaǵy emosıonaldyq jaǵdaıdyń joǵarylaǵanyn aıtqan. 60%-y óz jobalaryn iske asyra bastaıtynyn, al 67%-y jańa mamandyqtar tańdap, jańa kásip ıgerýge talpynyp, bilimin ári qaraı jetildirý úshin oqýǵa qatysatynyn jetkizgen.
– «Mama pro» qorymen yntymaqtastyq aıasynda jýyrda «Qoldaý» kásipkerlik ortalyǵynyń qyzmetkerleri «Qoldaý Start» júıesi boıynsha kásipkerlik negizderine oqytý boıynsha master-klastar serıasyn ótkizdi. Onda analarǵa bıznes-josparlar jazýǵa kómektesti, tyńdaýshylardyń býhgalterlik esep júrgizý, salyq salý, marketıń jáne balamaly ótkizý naryqtaryn izdeý salasyndaǵy ózekti suraqtaryna jaýap berdi, – deıdi «Qoldaý» kásipkerlik ortalyǵynyń korporatıvtik damý jáne jańa jobalar departamentiniń dırektory Aqbota Rústembekova.
Jaqynda qordyń Almatydaǵy fılıaly erekshe qajettilikteri bar balalardyń jasóspirim aǵa-ápkeleri úshin de arnaıy kýrs ashty. Sebebi, olarda kóp jaǵdaıda múgedektigi bar baýyry úshin ózgeler aldynda uıalý, ózin qolaısyz seziný sezimi baıqalady eken. Sondyqtan mundaı balalarǵa da psıhologtardyń kómegi qajet kórinedi. Ári olar kóbine ata-anasynyń nazaryna tys qalyp jatady. Óıtkeni áke-shesheniń bar kóńili kóbine aýrý balada bolady. Mine, osy oraıda erekshe balalaryn baǵyp-qaǵyp otyrǵan úsh ana balany ońaltý aldymen ananyń ózin saýyqtyrýdan bastalatynyn túsinip, ortalyq ashty. Búginde balanyń dıagnostıkasyna baǵyttalǵan ortalyq kóp, al analarǵa eshteńe joq. Mundaı máselege tap bolǵan áıel kúızeliske túsedi, sosyn ózin jalǵyz sezinedi. Mine, olardyń janynan osy kezde «Mama Pro» tabylyp júr.
Taıaýda atalmysh qor memlekettik tilde kýrstar ashýdy josparlap otyr. Mamandardyń málimetinshe, búginde Qazaqstanda erekshe bilim berý qajettiligi bar 100 myńnan astam bala turady.