Onyń anasy Aqmola oblysynyń Stepnogor qalasynda týǵan
Amerıkalyq otbasy asyrap alǵan qazaqstandyq jigit óz týystaryn tapty. Bul týraly onyń ápkesi Elızabet Azız aıtyp berdi, dep habarlaıdy Almaty-akshamy.kz QazAqparatqa silteme jasap.
Amerıkalyqtar asyrap alǵan qazaqstandyq Andreı Shatalın óziniń bıologıalyq ata-anasyn izdep júrgeni týraly alǵashqy jarıalanymymyzdan keıin áleýmettik jeli qoldanýshylary Andreı Shatalınniń anasymen jáne týystarymen tanys ekendikterin jazǵan.
Osy rette QazAqparat tilshisi aqparatty rastaǵan Elızabet Azız esimdi ápkesimen habarlasty.
«Biz onyń týǵan otbasyn taptyq, kómekteskenderińiz úshin rahmet», - dep jaýap berdi Elızabet Azız.
Buryn qyz onyń bıologıalyq anasy qaıtys bolýy múmkin dep aıtqan, biraq ol óziniń aǵasy Andreı Shatalınniń otbasyn nemese baýyrlaryn, ápkelerin izdegen bolatyn.
«Meniń aǵam da, men sıaqty asyrap alyndy. Ol 2005 jyly asyrap alyndy. Onyń týǵan kezdegi esimi - Andreı Shatalın. Ol shamamen 13-19 qazanda dúnıege kelgen. Ár qujattaǵy kún ár túrli. Bizde onyń bıologıalyq anasy Natalá Alekseevna Shatalına týraly aqparat bar. Ol shamamen 1973 jyly dúnıege kelgen jáne 2012 jyly qaıtys bolǵan-mys. Qujattarda onyń Andreıge deıin taǵy bir balasy bolǵandyǵy aıtylǵan, sondyqtan biz ol týraly jáne basqa da yqtımal aǵalary men ápkeleri týraly bilýge tyrysamyz», - dedi Elızabet Azız.
Qyzdyń aıtýynsha, onyń aǵasy Astana qalasynda (qazirgi Nur-Sultan - avt) dúnıege kelgen, sodan keıin ony Manas kóshesindegi aýrýhanada qaldyrǵan. Keıin ony elordadaǵy mamandandyrylǵan balalar úıine tapsyrdy.
«Onyń anasy Aqmola oblysynyń Stepnogor qalasynda týǵan. Týý týraly kýálikte týǵan ákesiniń aty joq. Sondaı-aq, biz Andreıdiń bıologıalyq anasynyń otbasy músheleri týraly aqparat tabýǵa tyrysamyz. Keıbir málimetter boıynsha, Andreı jartylaı orys, jartylaı qazaq», - dedi Elızabet Azız.
Eske sala ketsek, amerıkalyqtar asyrap alǵan qazaqstandyq jigit óz týystaryn izdep jatqany týraly habarlaǵan bolatynbyz.