«Indýstrıalyq aımaq-Almaty» JSHS dırektory Ádil Amralın Óńirlik komýnıkasıalar qyzmetiniń baspasóz konferensıasy barysynda Indýstrıalyq aımaqtyń 2021 jylǵy qyzmetiniń qorytyndylary týraly aıtyp berdi, dep habarlaıdy Almaty-akshamy.kz
Onyń málimetinshe, iske qosylǵan jeti jobanyń jalpy quny 48 mıllıard teńgeden asty, 749 jumys orny ashyldy. Jaqyn kúnderi 65 jumys ornyn qurýmen jalpy somasy 4,6 mlrd.teńgege «Qaz-Dıa-Test» JSHS-niń taǵy bir jobasy iske qosylady.
Ádil Amralın qurylǵan árbir óndiris týraly egjeı-tegjeıli aıtyp berdi. Mysaly, osy jyldyń aqpan aıynda quny 11,3 mlrd teńgeden asatyn mys jáne alúmını sozba sym shyǵaratyn Eýrazıalyq metalýrgıa zaýyty («KMK Investment» JSHS) alǵashqylardyń biri bolyp ashyldy.
«Kásiporynda qosymsha 80 jumys orny quryldy, al onyń óndiristik qýaty jyl saıyn 25 000 tonnadan astam ónimdi quraıdy. Aıta ketý kerek, Eýrazıalyq Energokombınat birden birneshe óndiristi qamtıdy. Birinshi kezeńde 2018 jyldyń qyrkúıeginde ınvestısıalyq kompanıa óndiris qýattylyǵy jylyna 100 000 km kabelden asatyn Evrazkabel Kabeldik-ótkizgish ónimderin shyǵaratyn zaýytty iske qosty», - dedi Almatydaǵy IA dırektory.
Keıingi jyldary ınvestısıalyq kompanıa Almaty ındýstrıalyq aımaǵynda polıetılender men propılender, qorytpalardan jasalǵan asa jeńil kabeldik naýalar óndirisin iske qosýdy, sondaı-aq ınovasıalyq ázirlemeler salasyndaǵy ǵylymı-zertteý ınstıtýtyn ashýdy josparlap otyr.
Astana kúnine oraı Almatynyń Indýstrıaldy aımaǵynda avtoklavty gazobeton óndiretin eki kásiporyn – «SK Rahat» JSHS jáne «G.S.G. Vysotnık» JSHS iske qosyldy. Qazirgi ýaqytta eki kásiporyn Áleýmettik jáne komersıalyq turǵyn úıdiń iri qurylys salýshylaryn sapaly qurylys materıaldarymen qamtamasyz etedi. «SK Rahat» JSHS óndirisiniń birinshi kezeńiniń qurylysyna 1,5 mlrd teńge ınvestısıa salyndy. Kásiporynda jylyna 180 myń tekshe metr ónim shyǵarý josparlanyp otyr, 40 jańa jumys orny ashyldy. «G.S.G. Vysotnık» JSHS ınvestısıa somasy 1,4 mlrd teńgeden asty. Óndiris qýattylyǵy jylyna 100-120 myń tekshe metrden astam ónim shyǵarady, 85 jańa jumys orny ashyldy.
Táýelsizdiktiń 30 jyldyǵyna oraı Indýstrıalyq aımaqta eń iri ónerkásiptik nysan – úlken dıametrli bolat dánekerlengen qubyrlar shyǵaratyn «Asia Steel Pipe Corporation» JSHS zaýyty iske qosyldy. Kásiporynnyń ónimi munaı, gaz, sý, munaı ónimderin tasymaldaýǵa arnalǵan jáne ony taý-ken, qurylys, hımıa ónerkásibinde, energetıkada paıdalanýǵa bolady. Sondaı-aq, korozıaǵa qarsy jabyndar óndirisi jolǵa qoıylǵan. Zaýytta 304 turaqty jumys orny quryldy. Jobalyq qýattylyǵy jylyna 100 myń tonna qubyr ónimderin quraıdy.
Jyl sońyna deıin Indýstrıalyq aımaqta «Qaz-Dıa-Test» JSHS medısınalyq dıagnostıkalyq test-júıelerin shyǵaratyn zaýyt ashý josparlanýda. Kompanıa ınfeksıalyq jáne onkologıalyq aýrýlarǵa jedel testter júrgizýdi, qorektik ortalardyń alǵashqy otandyq, serıalyq ónerkásiptik óndirisin damytýdy josparlap otyr.
Sóziniń sońynda Ádil Amralın shaǵyn jáne orta bıznesti júrgizýge arnalǵan eń úzdik formattardyń biri – shaǵyn óndiristik parkterdi iske asyrý jónindegi joba týraly aıtyp berdi.
«Olar Indýstrıaldy aımaqta da, Almaty qalasynda da ashyldy. Bıyl Alataý aýdanynda «Asia Prom Textile» JSHS jáne Indýstrıaldy aımaqta «ADS Industries» JSHS eki óndiristik park iske qosyldy, ınvestısıa somasy 500 mln teńgeden astam, 170 jumys orny ashyldy», - dep tolyqtyrdy Ádil Amralın.
2021 jyldyń sońyna deıin qosymsha 3 ónerkásiptik park iske qosylady, onyń ishinde ındýstrıalyq aımaq aýmaǵynda «ALAESTATE» JSHS jáne «KazStroyTrade» JSHS jáne Túrksib aýdanynda «CityBus» JSHS, jalpy ınvestısıa somasy 980 mln teńge, 235 jumys orny ashylady. Búgingi kúni Almatynyń ónerkásiptik parkterindegi óndiris oryndarynyń jalpy alańy 17 435 sharshy metrdi quraıdy, ınvestısıalardyń jalpy somasy 1,2 mlrd teńge jáne 424 jumys orny quryldy.