Almatynyń dızaın-kodyn engizý kezinde jańa tásilderge beıimdelý úshin 1,5 jyl ótpeli kezeń qoldanylady. Bul týraly Almaty qalasy ákiminiń orynbasary Asqar Ámrın Almaty máslıhatynyń kezekti XIII sesıasy barysynda habarlady.
Qala ákimi Erbolat Dosaevtyń tapsyrmasyna sáıkes dızaın-kod bekitilgennen keıin kezeń-kezeńimen engiziledi.
«Jańa nysandar úshin usynystar men talaptar tolyqtaı qoldanylady. Kásipkerlerdi erikti ári belsendi túrde dızaın-kod qaǵıdattaryn engizýge yntalandyrý jáne sol arqyly qalanyń kelbetin jaqsartý úshin qoldanystaǵy nysandarǵa keshendi túrde jaqyndaımyz», - dedi Almaty ákiminiń orynbasary dızaın-kodty ázirleý kezinde barlyq normatıvtik-quqyqtyq talap saqtalǵanyn aıtty.
Onyń aıtýynsha, dızaın kodynyń saıt servısi ázirlengen. Bul aqparat jınaýǵa jáne bilim almasýǵa arnalǵan ortalyq alań. Saıt dızaın kodty engizý kezinde dıalog alańy bolady.
Dızaın-kodty ázirleý kezinde qalalyq ortanyń negizgi nysandaryn kim qalyptastyrady jáne kim paıdalanady degen másele anyqtaldy. Zertteýler negizinde turǵyndar, kásipkerler, memlekettik organdardyń, bilim berý mekemeleriniń jáne kreatıvti qoǵamdastyqtyń ókilderi, sonymen birge dızaınerler men ázirleýshiler syndy dızaın kodqa beı-jaı qaramaıtyn múddeli taraptar anyqtaldy.
«Qatysýshylardyń pikiri men múddesin jan-jaqty esepke alý dızaın-kodty keshendi jáne teńdestirilgen qujat retinde qalyptastyrýǵa yqpal etti. Bul tájirıbede ózgerister engize bastaǵanda pysyqtalatyn qujat», - dedi Asqar Ámrın.