Ortalyq qalalyq klınıkalyq aýrýhananyń neırohırýrg-dárigerleri bel omyrtqany tilip, jasandy ımplantpen almastyrý boıynsha kúrdeli ota jasady, dep habarlaıdy Almaty-akshamy.kz.
«Pasıent bizge omyrtqa jaraqaty asqynǵannan keıin keldi. Buryn bel omyrtqasy synǵan oǵan keshiktirmeı ota jasaý qajet boldy. Óıtkeni ýaqyt ótken saıyn aıaq-qoly jansyzdanyp, sal bolyp qalý qaýpi joǵarylaı tústi», - deıdi bólimshe meńgerýshisi Marat Almatov.
Aıtýynsha, omyrtqany ınovasıalyq ádispen almastyrýǵa múmkindik beretin joǵary tehnologıalyq operasıa. "Otanyń mundaı túri qala boıynsha eki-aq aýrýhanada jasalady. Sonyń biri – ortalyq qalalyq klınıkalyq aýrýhana. Bizdiń klınıka kúrdeli otany jasaýǵa qajetti qondyrǵylarmen tolyq jabdyqtalǵan", - deıdi maman.
Sheberlik klasy sheńberinde №7 qalalyq klınıkalyq aýrýhananyń omyrtqa hırýrgıasy bólimi jetekshisi Baqyt Aǵlaqovpen birge jasalǵan operasıa aqysy MÁMS paketi esebinen tólenedi.
«Saqtandyrý paketiniń aýqymy keń, ol saqtandyrylǵan azamattarǵa úlken múmkindikter beredi. Oǵan aǵza almastyrý, býyn almastyrý, neırohırýrgıalyq jáne kardıohırýrgıalyq qyzmetter kiredi. Onyń ústine pasıent paıdalanatyn qyzmet kólemi tólegen jarnasyna táýeldi emes, medısınalyq kómek qansha qajet bolsa, sonsha paıdalanady. Mysaly, osy otaǵa MÁMS esebinen 4,5 mıllıon teńge tólenedi», - dedi MSQ Almaty fılıalynyń dırektory Tileýhan Ábildaev.
"Eskeretin jaıt, atalǵan qyzmet túrlerin paıdalaný úshin medısınalyq kórsetilimder bolýy qajet, - delingen OQKA baspasóz-qyzmetiniń habarlamasynda.