Stansıa jylyna 225,7 mln kVts elektr energıasyn óndiretin bolady.
Almaty qalasynan 140 shaqyrym qashyqtyqta salynyp jatqan qýaty 60 MVt jańa jel elektr stansıasy bıylǵy tamyz aıynyń basynda paıdalanýǵa beriledi, dep habarlaıdy Almaty-akshamy.kz QazAqparatqa silteme jasap.
«Samuryq-Energo» AQ baspasóz qyzmetiniń málimetinshe, stansıa jylyna 225,7 mln kVts elektr energıasyn óndiretin bolady. JES salý jáne iske qosý parnıktik gazdar shyǵaryndylaryn 206 myń tonnaǵa deıin azaıtýǵa múmkindik beredi, sondaı-aq jylyna shamamen 89 myń tonna dástúrli otynnyń ornyn basady.
«Energetıkalyq nysan Almaty oblysynyń Eńbekshiqazaq aýdanynda Shelek dálizinde salynyp jatyr. Munda jeldiń ortasha jyldyq jyldamdyǵy – 50 metr bıiktikte sekýndyna 7,8 metr, al aǵynnyń tyǵyzdyǵy – 310 Vt/m2. Bolashaqta JES qýatyn 300 MVt-qa deıin arttyrý josparlanýda», - delingen baspasóz qyzmetiniń málimetinde.
Jobanyń jalpy quny – 37,4 mlrd teńge. Ony «Samuryq-Energo» AQ qazaqstandyq elektr energetıkalyq holdıńi «Power China» korporasıasymen seriktestikte iske asyrýda.