Kórmege ártistiń jeke zattary men fotoqujattary qoıylǵan.
Qazaqstanǵa Eńbegi sińgen óner qaıratkeri, Halyq ártisi Asanáli Áshimovtiń 85 jyldyǵy qarsańynda «Abyzǵa aınalǵan Asanáli» atty kórmeniń ashylýy ótti, dep habarlaıdy Almaty-akshamy.kz Almaty.tv silteme jasap.
Mádenı sharada óner maıtalmanynyń jeke zattary men fotoqujattary, dostary men áriptesterinen kelgen syılyqtary qoıylyp, kópshilik nazaryna usynyldy. Kórmege Asanáliniń zamandastary men óner ıeleri jáne qala ákiminiń orynbasary Arman Qyryqbaev qatysyp, izgi tilekterin bildirdi.
«Jalpy, qazaq – sózi uzyn halyqpyz ǵoı. Qazirgi ýaqytta sózdiń taýsylǵanyn baıqap júrmyn. Óıtkeni sońǵy 15-20 jyldyń kóleminde Asanálini aıtystyń tórine otyrǵyzyp, tóraǵa dep... Ár jerde tanystyrǵan saıyn Asanáliniń ár sıpatyn aıtamyn dep sózim taýsyldy. Ózińdi-óziń qaıtalaı bermeısiń ǵoı», – dedi aqyn, Qazaqstannyń Eńbek sińirgen qaıratkeri Júrsin Erman.
Asanáli ózi somdaǵan keıipkerlerin taýdaı talanty arqyly asqan sheberlikpen oınap, kórermenniń shynaıy yqylasyna bólengen jan. Onyń bul qasıeti kórkemdik áleminiń ózgelerden erekshe, shyǵarmashylyqqa degen súıispenshiligin kórsetip tur.
«Bizdiń teatrymyzda, qudaı qalasa, Asanáliniń týǵan kúni - 8 mamyrda alǵash ret jańa janrda ınteraktıvti spektákl daıyp jatyrmyz. Oǵan elimizdiń kórermeni qatysatyn bolady. Sol kezde de barshańyzben qaýyshamyz dep oılaımyn», – dedi M.Áýezov atyndaǵy qazaq ulttyq drama teatrynyń dırektory Erkin Jýasbek.